Ka ge Farao a be a gapeletša Baisiraele go šoma ga boima e le makgoba, Jehofa o ile a romela Moshe le Arone go Farao. O ile a re ba yo botša Farao gore: ‘Lesa batho ba ka ba sepele, e le gore ba yo nthapela kua lešokeng.’ Farao o ile a araba ka boikgogomošo a re: ‘Ga ke na taba le seo Jehofa a se bolelago, nka se lese Baisiraele ba sepela.’ Farao o ile a dira gore Baisiraele ba šome ga boima go feta mathomong. Jehofa o ile a galefišwa ke seo, gomme a thoma go otla Farao. Na o a tseba gore Jehofa o dirile seo bjang? O ile a tliša Dikotlo tše Lesome nageng ya Egipita. Jehofa o ile a botša Moshe a re: ‘Farao ga a ntheetše. Ka moswana mesong, o tla ba a le Nokeng ya Nile. O ye go yena gomme o mmotše gore ka ge a ganne go lesa batho ba ka gore ba sepele, gona meetse ka moka a Noka ya Nile a tla fetoga madi.’ Moshe o ile a theetša Jehofa gomme a ya go Farao. Farao o ile a lebelela ge Arone a betha meetse a Noka ya Nile ka lepara la gagwe gomme a fetoga madi. Noka yeo e ile ya thoma go nkga, dihlapi tša hwa, gomme batho ba se sa ba le meetse a go nwa. Lega go le bjalo, Farao o ile a gana go dumelela Baisiraele gore ba sepele.

 Ka morago ga matšatši a šupago, Jehofa o ile a botša Moshe gore a boele go Farao gomme a fihle a re: ‘Ge o sa lese batho ba ka gore ba sepele, gona naga ya Egipita e tla tlala ka digwagwa.’ Ka ge Farao a ile a gana go theetša, Arone o ile a emiša lepara la gagwe gomme digwagwa tša tlala nageng ya Egipita. Digwagwa tšeo di ile tša tlala ka dintlong, tša namela mepete gomme tša tsena le ka dibjaneng. Di be di tsena go gongwe le go gongwe! Farao o ile a kgopela Moshe gore a rapele Jehofa gore a bolaye digwagwa tšeo. Farao o ile a tshepiša gore o tla lesa Baisiraele ba sepela. Ka gona Jehofa a bolaya digwagwa tšeo gomme Baegipita ba di kgoboketša ya ba tše dintši. Ke moka naga ya Egipita ya nkga. Eupša Farao o ile a se dumelele Baisiraele ba sepela.

Ke moka Jehofa a re go Moshe: ‘Botša Arone gore a bethe lerole ka lepara la gagwe, gomme lerole leo le tla fetoga menang, goba dikhunkhwane tša go loma.’ Ka morago ga gore Arone a bethe lerole, naga ka moka ya tlala menang. Ba bangwe ba batho ba Farao ba re go yena: ‘Kotlo ye etšwa go Modimo.’ Eupša Farao a se ba theetše, gomme a se dumelele Baisiraele ba sepela.