Ízrel dineʼé éí naalteʼ ídlínígi átʼéego naanish yídahoniłkad ńtʼééʼ. Jiihóvah éí Mózes dóó Éran, Féro yichʼįʼ ayííłʼaʼgo kóbidohní, yiłní: ‘Shidineʼé bééʼníłnííh áko honoojíidi shichʼįʼ dahodísingo áłah nídaadleeh doo.’ Ndi Féro ání, ‘Jiihóvah ájínínígíí doo bikʼeh ádeeshníił da, índa Ízrel doo bééʼdeeshnih da.’ Áádóó Féro éí tʼóó tséʼédin yéigo nidaalnishgo áyiilaa. Jiihóvah éí haitʼéego Féro akʼizhdiʼdootı̨́įłgo áyiilaa? Éí Neeznáago Bee Achʼįʼ Nahwidiyooʼnaałii yee atíʼiilaa. Jiihóvah éí Mózes ííłní, ‘Féro doo shíistsʼą́ąʼ da. Abínígo, Náil tooh nílínídi doogááł. Baa díínááł áádóó ábididííniił, Shidineʼé doo bééʼníłnííhgóó tooh nílínígíí dił dooleeł.’ Mózes akʼeh hojíłʼı̨́įdgo Féro baazhníyá. Féro binááł Éran bigish tooh yee néidííłhaal, áádóó dił silı̨́ı̨́ʼ. Tooh nílínígíí niłchxon silı̨́ı̨́ʼ, łóóʼ daneezná, índa bitsʼą́ą́dóó tó doodlı̨́ı̨́ł yę́ę ádin. Féro éí tʼahdii Ízrel dineʼé doo bééʼdeeshnih da nízin.

 Tsostsʼid yiską́ą́dóó bikʼijįʼ, Jiihóvah éí Mózes, Féro yichʼįʼ anááyííłʼaʼgo kóbidiní, yiłní: ‘Shidineʼé doo bééʼníłnííhgóó, jó, Ííjipgi chʼał tʼóó ahayóigo deeshłąął.’ Áko Féro tʼah doo diné yééʼiiłníih da. Áádóó Éran bigish yił dah diilniiʼgo chʼał tʼóó ahayóí hazlı̨́ı̨́ʼ. Dahooghan góneʼ, tséskʼeh bikááʼ, dóó ásaaʼ dabiyiʼ góneʼ dahólǫ́. Tʼáá ałtsogóó dahólǫ́! Féro éí Mózes, Jiihóvah shá néinikąąhgo chʼał nahjįʼ kónílééh shá bidiní, yiłní. Áko bidineʼé bééʼdeeshnih. Áádóó Jiihóvah díí neʼ áyiilaa. Éí Ííjip dineʼé chʼał tʼááłáhíjįʼ yáádaaʼáago ádayiilaago ayóó átʼéego kéyah hółchxon silı̨́ı̨́ʼ. Ndi Féro tʼáadoo diné yééʼníłniiʼ da.

Áko Jiihóvah éí Mózes ííłní: ‘Éran bigish łeezh dibahí yee néididoołhał, áádóó tséʼédǫ́ʼii yázhí daʼdiłhashígíí hodooleeł.’ Tʼáá akǫ́ǫ́ tséʼédǫ́ʼii yázhí daʼdiłhashígíí hazlı̨́ı̨́ʼ. Féro bidineʼé łaʼ ádabiłní: ‘Díí yeeʼ God bitsʼą́ą́dę́ę́ʼ.’ Ndi Féro éí tʼahdii Ízrel dineʼé doo yééʼiiłníih da.