Ova Isilayeli vakuluminyua okuundapa unene ngo vapika. Jeova atumu Moisesi na Arau ku Farao opo vakapopie okuti: ‘Yeka ovanthu vange vaye, opo vakafende ame moluhandya.’ Farao nomutomba akumbulula okuti: ‘Ame himalingi etyi Jeova apopia, tupu himayeke ova Isilayeli vaye.’ Konyima pahe Farao evekuluminya okuundapa unene. Jeova alongesa Farao. Okuti ove utyii oñgeni alinga? Aetako Omahingano 10 mo Egitu. Jeova apopila Moisesi okuti: ‘Farao kamanthehelela. Komuhuka malauka kondongi Nilu. Enda, kemupopile okuti mokonda kayekele ovanthu vange vaye, omaande aeho o mo Nilu maatyituka ohonde.’ Moisesi etavela aende ku Farao. Farao wamona puetyi Moisesi aveta notyimuti komaande mondongi Nilu, atyituka ohonde. Omaande mondongi aaniki omapita, onombisi ambunkhi, tupu ankho kaetavela okunua. Farao ahayeke ova Isilayeli vaye.

 Etyi palamba ononthiki 7, Jeova atumu Moisesi akondoke ku Farao no nondaka ombu: ‘Inkha kuyeke ovanthu vange vaye, mo Egitu mamuyula omamboto.’ Ovanthu avavasi omamboto mo nondyuo mbavo, no ko maula, no povilindo viavo. Omamboto ankho ekahi ponomphangu ambuho! Farao apopila Moisesi opo eveitile-ko ku Jeova mokonda yehingano olio. Farao apopi okuti mayeke ova Isilayeli vaye. Ngotyo Jeova atalameka ehingano olio iya ova Egitu avahimbika okuongiya omamboto ankhia. Mo Egitu amuhimbika okunika omapita. Mahi, no ngotyo Farao ahayeke ova Isilayeli vaye.

Jeova apopila Moisesi okuti: ‘Arau avete notyimuti tyae pohi, ombuma yatyo maityituka onome.’ Liwa-liwa onome ombo ambuliyandyana. Vamwe po va Egitu avapopila ovanthu okuti: ‘Ehingano eli liatunda ku Huku.’ Mahi, no ngotyo, Farao ahayeke ova Isilayeli vaye.