Bɛmaanle Yizilayɛma yɛle gyima ɛsesebɛ kɛ ngɛkɛlɛ. Gyihova maanle Mosisi nee Aalɔn hɔhanle edwɛkɛ ɛhye hilele Falo: ‘Maa me menli ne mɔ ɛhɔ, amaa bɛazonle me wɔ fienemgbole ne anu.’ Falo vale anwomemaazo buale kɛ: ‘Mɔɔ Gyihova baha biala la ɛnvale me nwo, yɛɛ menrɛmaa Yizilayɛma ɛnrɛhɔ.’ Akee Falo maanle bɛyɛlɛ gyima ɛsesebɛ kpalɛ. Gyihova yɛle kɛ ɔkile Falo ɛzulolɛ. Asoo ɛze mɔɔ Gyihova yɛle a? Ɔvale Ngyegyelɛ Bulu ɔrale Yigyibitima anwo zo. Gyihova hanle hilele Mosisi kɛ: ‘Falo ɛlɛyɛ anzosesebɛ. Ɛhyema nwonlomɔ, ɔbahɔ Azule Naele ne anloa. Kɔha kile ye kɛ, kɛmɔ yeammaa me menli ne angɔ la ati, Azule Naele ne bahakyi mogya.’ Mosisi diele na ɔhɔle Falo ɛkɛ. Mɔɔ Aalɔn fa ye kpɔma ne abɔ Azule Naele ne anu la Falo nwunle ye, na nzule ne hakyile mogya. Azule Naele ne bɔle ɔ bo kɛ ɔbɔ, nuhua fɛlɛ ne wule, yɛɛ ɛnee bɛno nzule ne bie a ɔnyɛ boɛ. Noko Falo ammaa Yizilayɛma angɔ.

 Kenle nsuu anzi, Gyihova maanle Mosisi hɔhanle edwɛkɛ ɛhye hilele Falo: ‘Saa wɔammaa me menli ne angɔ a, Yigyibiti ɛke bayɛ ahɛlɛne ngome.’ Aalɔn maanle ye kpɔma ne zo, na ahɛlɛne ravale bɛ maanle ne bɔkɔɔ. Menli ne nwunle ahɛlɛne wɔ bɛ azua nu, bɛ ɛkpa ne mɔ azo yɛɛ bɛ ahyɛnze nu. Ɛnee ahɛlɛne wɔ ɛleka biala! Falo maanle Mosisi zɛlɛle Gyihova kɛ ɔye ngyegyelɛ ɛhye ɔvi ɛkɛ. Falo bɔle ɛwɔkɛ kɛ ɔbamaa Yizilayɛma adenle yeamaa bɛahɔ. Yemɔti Gyihova pɛle ngyegyelɛ ne azo, na Yigyibitima huohuanle ahɛlɛne ne mɔ anloa. Maanle ne anu bɔnle nvoanvoa. Noko eza Falo ammaa menli ne angɔ.

Akee Gyihova hanle hilele Mosisi kɛ: ‘Ka kile Aalɔn kɛ ɔva ye kpɔma ne ɔfi azɛlɛ nwo na munlutu ne bahakyi ngɔkɔwule.’ Ɛkɛ ne ala ɛleka biala yɛle ngɔkɔwule ngome. Falo menli ne bie mɔ hanle hilele ye kɛ: ‘Nyamenle a ɛva ngyegyelɛ ɛhye ɛra a.’ Noko Falo ammaa Yizilayɛma angɔ.