19 KAQ WILLAKÏ
Punta kaq kima castïgukuna
Esclävu kayaptinmi Egiptu nunakunaqa israelïtakunata alläpa trabajatsiyaq. Tsëmi Jehoväqa Moisestawan Aaronta kacharqan faraonta kënö niyänampaq: “Tsunyaqchö adorayämänampaq markä ëwakunanta jaqi”. Peru faraonqa alläpa orgullösu karmi kënö nirqan: “Imatapis Jehoväqa nikutsun. Peru noqaqa manam jaqishaqtsu israelïtakuna ëwakuyänanta”. Nïkurmi faraonqa masraq israelïtakunata trabajatsirqan. Tsëmi Jehoväqa yachakunampaq chunka formapa castigarqan. Moisestam kënö nirqan: “Faraonqa manam cäsumëta munantsu. Warëmi patsa waräriptin Nïlu mayuman ëwanqa. Tsëman ëwanki y willanki markä ëwakunanta mana jaqinqampita tsë mayu yawarman tikranampaq kaqta”. Tsënam Moisesqa Jehoväta wiyakur faraon kaqman ëwarqan. Y faraonpa rikëninchömi Aaronqa tukrunwan Nïlu mayuta wilurirqan, y jinan höram yawarman tikrarirqan. Y asyarmi qallëkurqan, tsëmi ni pipis tsë yakuta upïta puëdirqantsu, y pescädukunapis wanuyarqanmi. Peru faraonqa manam jaqirqantsu tsunyaqman israelïtakuna ëwakuyänanta.
Qanchis junaqtam Jehoväqa faraonta kënö ninampaq Moisesta yapë kacharqan: “Markä ëwakunanta mana jaqiptikiqa, ratsakkunam Egiptuman juntanqa”. Y mana wiyakuptinmi Aaronqa tukrunta pallarkurqan, y entëru nacionchömi ratsakkuna juntarirqan. Wayinkunachö, cämankunachö y plätunkunachömi kakoq. . . ¡Më tsëchömi junta karqan! Tsënam faraonqa Moisesta kënö nirqan: “Jehoväta nï, kë castïguta ushakäratsinampaq. Tsëqa jaqishaqmi israelïtakuna ëwakuyänanta”. Tsënam Jehoväqa tsë castïguta päraratsirqan, y Egiptu nunakunaqa mëtsikatam ratsakkunata montonayarqan. Tsëmi entëru nacion asyar qallëkurqan, peru faraonqa manam jaqirqantsu israelïtakuna ëwakuyänanta.
Tsënam Jehoväqa Moisesta kënö nirqan: “Tukrunwan patsata Aaron wilutsun. Tsëqa allpam chuspikunaman tikrarinqa”. Y tsënömi karqan, mëtsika chuspikuna yurïkurmi nunakunata kanir ushayarqan. Wakin Egiptu nunakunaqa kënömi faraonta niyarqan: “¡Këqa Diospa castïgunmi!”. Peru faraonqa manam jaqirqantsu israelïtakuna ëwakuyänanta.
“Kallpäta y puëdeq kënïta[m] rikätsiyashqëki, y Jehovä jutï kanqantam musyariyanki” (Jeremïas 16:21).