Egipciocunaca israelitacuna paicunapaj esclavocuna cajpimi sinchita trabajachun obligarcacuna. Chaimantami Diosca Moisesta Aarontapish faraonmanca ‘ñuca agllashca israelitacuna shitashca pambaman rishpa ñucata adorachun saqui’ nichun cacharca. Faraonca yallitaj jatun tucushca cashcamantami ‘¿pitaj chai Mandaj Diosca, paita cazungapajca? Israelitacuna richunca mana saquishachu’ nirca. Qꞌuipaca israelitacunataca ashtahuanmi trabajachirca. Chaimi Jehová Diosca pi pai cashcata faraonman ricuchisha nirca. ¿Ima shina? Egipto llajtaman 10 jatun llaquicunata cachashpami Diosca Moisesmanca, ‘faraonca ñucata mana cazunchu. Caya tutamantaca Nilo yacumanmi shamunga. Ñuca llajtata mana cachashcamantaca paitaca chai yacuca yahuarmi tucunga nigri’ nirca. Diosta cazushpami Moisesca faraonpajman rirca. Aarón caspihuan Nilo yacuta huajtajpica chai yacuca yahuar tucujtami Faraonca ricurca. Chai yacu ashnai callarijpimi pi mana ubyai tucurcacuna. Pescadocunapishmi huañurca. Pero faraonca israelitacuna richunca mana saquircachu.

 Moisestaca cutinmi 7 punllacuna qꞌuipaca Diosca faraonman cashna nichun cacharca, ‘paicuna richun mana saquijpica Egiptotami sapocunahuan llaquichisha’. Pero faraonca mana cazurcachu. Chaimantami Aarón caspita alzajpica tucui Egiptopi sapocuna jundarca. Sapocunaca huasicunapi camacunapi micuna platocunapipishmi jundarca. ¡Tucui ladocunapimi carca! Chaimi faraonca Moisestaca, ‘sapocunata anchuchichun Diosta mañai. Israelcunataca richun saquishami’ nirca. Jehová chai llaquita anchuchijpica huañushca sapocunata achca montoncunatami tandachirca. Chaimi chai llajtaca ashnai callarirca. Pero cutinmi faraonca israelitacuna richunca mana saquirca.

Qꞌuipaca Diosca Moisestaca, ‘Aarontaca Egipto llajtapi caj ñutu allpa piliscuna [“uchilla chuspicuna”, NM ] tucuchun, caspita chutashpa ñutu allpata huajtai ni’ nirca. Chaita rurajpica tucui ladocunapimi gentecunata canij uchilla chuspicuna ricurirca. Huaquin egipciocunaca faraontaca, ‘caitaca Taita Diospaj maquimi ruracun’ nircacunami. Chashna nijpipish faraonca israelitacuna richunca mana saquircachu.