Egipto runakunam Israel runakunata ñakarichispa llumpayta llamkachirqaku. Chaymi Jehova Diosqa Moiseswan hinaspa Aaronwan kaynata faraonman willachirqa: “Kachariy llaqtayta chunniqpi yupaychawananpaq”, nispa. Faraonñataqmi hatun tukuspan nirqa: “Imanawanqataq Jehova Diosnikiqa. Israel runakunataqa manam kacharisaqchu”, nispa. Hinaspam aswanraq llamkachirqa. Chayraykum Jehova Diosqa 10 castigokunawan Egipto runakunata castigarurqa. Diosmi Moisesta nirqa: “Faraonqa manam kasuwanchu. Paqarinmi Nilo mayupi faraonman willanki llaqtayta mana kacharisqanrayku mayuta yawaryachinaymanta”, nispa. Moisesqa kasukuspanmi faraonman rirqa, chaymi Nilo mayuta Aaron tawnanwan waqtaykuptin yakuqa yawaryaruspan millapata asnarqa, challwakunapas wañururqam, tomanapaqpas manañam allinchu karqa. Chaywanpas faraonqa manam kachariyta munarqachu.

 Qanchis punchawmantam kaqmanta Jehova Diosqa Moiseswan faraonman willachirqa: “Sichu mana kachariyta munaptikiqa kayrakunawanmi nacionnikita castigasaq”, nispa. Faraon mana kasukuptinmi Aaronqa makinta haywariykurqa yakukunapa hawanman, hinaptinmi kayrakuna lluqsiramurqa allpata tapaykunankama. Tukuy hinastinpim rikurirurqa: Wasikunapi, puñunankupi hinaspa mikuna platokunapipas. Chaymi faraonqa Moisesta nirqa: “Diosta ruegakuychik kayrakunata chinkachinanpaq, hinaptinqa castaykikunatam kacharisaq”, nispa. Dios sosegarachiptinmi muntu-muntunta huñururqaku, allpapas asnarirqam. Chaywanpas faraonqa manam kasukurqachu.

Chaymantam Jehova Diosqa Moisesta nirqa: “Aaronyá tawnanwan allpata waqtachun, chaynapi chuspiyarunanpaq”, nispa. Chaymi chuspikuna runakunata tukururqa. Hinaptinmi wakin Egipto runakuna faraonta nirqaku: “¡Diosmantam kayqa!”, nispa. Chaywanpas Israel runakunataqa faraonqa manam kacharirqachu.