Israel runakunaqa Egiptopin esclavo kasharanku. Chaymi Jehová Diosqa Moisesta Aarontawan kacharan faraonman kayta nimunankupaq: “Llaqtayta kachariy ch’inneqman rinankupaq”, nispa. Faraonmi ichaqa jatunchakuspa niran: “Manan Israel llaqtataqa kacharisaqchu, ¿pitaq Jehová Diosri?”, nispa. Chay qhepamanmi faraonqa astawanraq Israel runakunata llank’achiran. Chaymi Diosqa chunka plagakunata Egiptoman apachimuran. Jehová Diosmi Moisesta niran: “Faraonmi tutamantan Nilo mayupi kashanqa, chaypin payta ninki: ‘Kay mayutan yawarman tukuchisaq llaqtayta mana kacharisqaykirayku’”, nispa. Chaymi Moisesqa faraonwan tupaq riran. Faraón rikushaqtinmi Aaronqa Nilo mayuta taunanwan waqtaran, jinan unuqa yawarman tukuran. Mayuqa asnariytan qallariran, manan ujaytapas atirankuchu challwakunapas wañupurankun. Chaywanpas faraonqa manan Diospa llaqtanta kachariyta munaranchu.

 Qanchis p’unchay qhepamanmi Diosqa Moisesta kamachiran faraonman kayta nimunanpaq: “Sichus llaqtayta mana kacharinkichu chayqa Egiptomanmi k’ayrakuna junt’aykunqa”, nispa. Faraonqa manan kasukuranchu, chaymi Aaronqa taunanta oqariran, jinan k’ayrakunaqa wasikunaman, puñunakunaman junt’aykuran. ¡Tukuy ladopin kasharan! Chaymi faraonqa Moisesta niran: “Jehová Diosmanta mañakuy kay plagata chinkachinanpaq, jinaspa llaqtanta kacharipusaq”, nispa. Chaymi Diosqa k’ayrakunata wañuchiran, jinan Egipto runakunaqa montonkunapi k’ayrakunata juñuranku. Llaqtantinmi asnariran, chaywanpas faraonqa manan Israel llaqtata kachariranchu.

Chay qhepamanmi Diosqa Moisesta niran: “Aarón taunanwan pampata waqtachun, jinan polvoqa ñut’u ch’uspikunaman tukunqa”, nispa. Chayta ruwaqtinmi, ñut’u ch’uspikuna runakunata kaniran. Wakinmi faraonta niranku: “¡Kay plagaqa Diosmantan jamun!”, nispa. Chaywanpas faraonqa manan Israel llaqtata kachariranchu.