Израильтяноря ашэлэ раборя, и пэр лэндэ тасавэнас, кай вонэ тэ терэн ԥари бути. Важ када о Иегова приԥэндя лэ Моисеёсти и лэ Аароности тэ пэрэдэн лэ фараоности алава: «Одмэк мэрно народо, кай вонэ тэ жан андэ пустыня и тэ стон важ мандэ празднико». О фараоно холяса ԥэндя: «Манди на трэбуй, со ԥэнэн о Иегова. Мэ на одмэкава лэ израильтянонэн». О фараоно стердя кадя, кай вонэ тэ терэн инке май бут бути. О Иегова закамля тэ просытярэл лэ фараонос. Ӷанэс сар? О Дэл бишалдя пэ египтяноря дэш биды. О Иегова ԥэндя лэ Моисеёсти: «Мэ диқав, кай о фараоно на подэлпэ мэрнэ вастэсти. Тэсара во авэла по бэрэӷо паша лэн Нило. Жа лэстэ и ԥэн, кай вся о паи андо Нило ашэла ратэса. Мэ бишалава пэр лэстэ кадэя бида, важ кода кай во на одмэкэл мэрно народо». О Моисеё кангля лэ Иеговас и жыля каринг о фараоно. Кала о фараоно тердёлас по бэрэӷо, о Аароно дядап па паи ла рувляса и андо Нило о паи ашэля ратэса. И лэн ля фартэ найдраго тэ қандэл, о мащё муля, и о паи уже нащи сас тэ пэн. Но о фараоно всаек на одмэкля лэ израильтянонэн.

 Сар прожыля курко, о Иегова приԥэндя лэ Моисеёсти тэ рийпэ каринг о фараоно и тэ пэрэдэл лэсти алава: «Сар ту на одмэкэса мэрнэ народос, па вся Египто авэна ляӷушки». Но о фараоно на кангля лэ Дэвлэс. О Аароно вазгля пэстири рувли, и анда всаворэ рига линэ тэ виӷулен и ляӷушки. Лэ ляӷушкэн сас ԥэрдо. Вонэ слинэ андо цэр, андо ҭан, андэ посуда! О фараоно мангэлас лэ Моисеёс, кай о Иегова тэ тердярэл кадэя бида. О фараоно дя алав, кай одмэкэла лэ израильтянонэн. Тоди о Иегова тердярдя кадэя бида и египтяноря линэ тэ стидэн андэ кучи лэ мулэ ляӷушкэн. Па вся Египто фартэ найдраго қандэлас. Но о фараоно на одмэкля лэ народос.

Тоди о Иегова ԥэндя лэ Моисеёсти: «Мэк о Аароно дэладап па ԥув пэстиря рувляса, и анда прахо ашэла комаря, савэ фартэ ханпэ». Сар кати о Аароно када стердя, всаворэ ригэндар привуряйлэ комаря. Лэ фараоностирэ слуӷоря линэ тэ ԥэнэн: «Када бида лэ Дэвлэстар». Но о фараоно всаек на одмэкля лэ израильтянонэн.