Beena Isaleele abaadi abafubu midimo ibukopo bu bampika. Yehowa nkutuma Moyiise na Aarone kwa Faraone na mukandu shi: ‘Leka mwilo wande wende bwa kunfubila mu kabaaka.’ Faraone nkwaluula na kapeesha kooso shi: ‘Nta ntemesha abyakula Yehowa, na ntanfungula bena Isaleele nya.’ Akupu Faraone nkunyiisha kwibafubisha kukila kumpala. Yehowa baadi adidi kupa Faraone dilongyesha. Weuku bibakitshine? Baadi mutume Bipupa ekumi mu Ejiipitu. Yehowa balungwile Moyiise shi: ‘Faraone ta mumpushiishe. Ku namashika, eekala ku Mwela wa Nile. Enda kwaadi, omulungule shi bu byash’akyebe kuleka mwilo wande wenda, meema ooso a Mwela wa Nile aaluluka mase.’ Moyiise baadi mukookyele aye nkwenda kwi Faraone. Faraone nkumona kubaadi Aarone mukupile mukombo mu meema ao namu nkwaluluka mase. Mwela nkubanga kununka eshiko, mishipa nkufwa, takubaadi dingi meema e buuwa kutoma mu Nile nya. Anka, Faraone baadi kyatungunuka na kupela kuleka mwilo bwashi wende.

 Kunyima kwa mafuku musambo, Yehowa batumine Moyiise kwi Faraone na ungi mukandu shi: ‘Su tokyebe kutuma mwilo wande, mu Ejiipitu mooso amuulu na nsobya.’ Aarone nkwela mukombo mwiyilu, akupu nsobya kubanga kusoboka mbalo yooso. Bantu kubanga kumona nsobya mu mashibo aabo, ku nsala yaabo na mu malonga aabo. Nsobya ibaadi mbalo yooso! Faraone nkulungula Moyiise bwadya kuteka Yehowa bwa shi emikye kyakya kipupa. Faraone nkumulaa shi apoosola beena Isaleele bwabadya kwenda. Yehowa nkwimika kyakya kipupa, akupu beena Ejiipitu nkubunga nsobya ifwe mituuto mituuto. Eumbo dyooso nkubanga kunuunka. Faraone nkupela dingi kupoosola beena Isaleele bwabadya kwenda.

Akupu, Yehowa balungwile Moyiise shi: ‘Abitungu shi Aarone akupile mukombo waye mu nsenga lufwinkinyi lwalulukye bu tumwe, sungwa twiishi twilekeene atusumanaa.’ Musango umune tumwe tubafwimine mbalo yooso. Bangi bantu ba ku lupese lwa Faraone nkumulungula shi: ‘Efile Mukulu nyi batumu kino kipupa.’ Kadi Faraone baadi’nka apele kuleka beena Isaleele bwabadya kwenda.