Tau Israel nipaksa pěhal᷊ẹ̌ kere ělang. Yehuwa něngoro si Musa dingangi Harun pẹ̌sombang dingangi Firaun gunang maul᷊ị ini, ’Pakawebasẹ̌ko umatẹ̌-Ku, tadeạu i sire botonge měngibadah si Siạ su padang belantara.’ Firaun simimbahẹ̌ dingangu obote, ’Iạ tawe mẹ̌pandung apa niul᷊ị i Yehuwa. Iạ tawe měmala tau Israel matamai.’ Bọu ene, i Firaun něngoro tau Israel pěkoạ hal᷊ẹ̌ limembong mal᷊awọ. Ual᷊ingu ene, Yehuwa něhukung si Firaun. I kau masingkạ kerea carane? I sie někoạ Mapul᷊o Tulah su Misirẹ̌. Yehuwa nẹ̌bera si Musa, ’Firaun madiri dumaringihẹ̌ si Siạ. Dịěllo mal᷊ukadẹ̌, i sie makoạ sarang Sal᷊ụ Nil. Pẹ̌sombang dingange kụ paul᷊ị akẹ u Sal᷊ụ Nil sarung makoạ daha, ual᷊ingu i kau tawe měmala umatẹ̌-Ku.’ Musa natamai nẹ̌sombang i Firaun. Firaun nakasilo i Harun něměbahẹ̌ akẹ u Sal᷊u Nil dingangu těkinge, kụ akẹ ene nakoạ daha. Bọu ene, sal᷊ụ ene nawuhụ, kinạ nate, kụ akẹe tawe wotonge inungang. Katewe, Firaun tatapẹ̌ madiri měmala tau Israel.

 Pitu ěllo bọu ene, Yehuwa něngoro si Musa pěhabarẹ̌ ini si Firaun, ’Mạeng i kau madiri měmala umatẹ̌-Ku, Misirẹ̌ sarung mapenẹu tumpaheạ. Firaun madiri měmala si sire, hakị u ene Harun něhengkẹ těkinge, kụ tumpaheạ něnětạ němenẹ Misirẹ̌. Tau Misirẹ̌ nakasilo tumpaheạ su wal᷊e, su ral᷊okang, dingangu su manga bohogẹ̌. Tumpaheạ ene su haghing tampạ! Firaun naul᷊ị si Musa gunang pẹ̌dorong tul᷊ung si Yehuwa tadeạu tulah ene měngědo. Firaun nẹ̌diandi sarung měmala tau Israel. Hakị u ene Yehuwa někoạ tulah ene něngědo. Tau Misirẹ̌ něnampung tumpaheạ seng nate kụ ene sěbạe mal᷊awọ sarang Misirẹ̌ nawuhụ. Katewe i Firaun madiri měmala tau Israel.

Bọu ene Yehuwa naul᷊ị si Musa, ’Oroko i Harun pěměbahẹ̌ ěntana dingangu těkinge, kụ awul᷊ẹ̌ sarung makoạ hambusẹ̌.’ Hambusẹ̌ apidu němenẹ Misirẹ̌. Pirang katau ělang i Firaun naul᷊ị, ’Tulah ini kai bọu Mawu.’ Katewe i Firaun tatapẹ̌ tawe měmala tau Israel.