Ayisraele achichizikanga kuti agwirengi ntchitu nge akapolu. Yehova wangutuma Mozesi ndi Aroni kuti akakambiyi Farawo kuti: ‘Zomereza ŵanthu ŵangu kuti aluti kuchipululu kuti akandisopi.’ Farawo wangumuka mwakujikuzga kuti: ‘Ndilivi navu ntchitu vo Yehova wakamba, ndizomerezengi cha kuti Ayisraele aluti.’ Pavuli paki, Farawo wanguchitisa kuti Ayisraele agwirengi ntchitu ukongwa. Yehova wakhumbanga kumusambiza chinthu chinyaki Farawo. Uziŵa vo wanguchita? Wanguzisa miliri 10 ku ŵanthu a ku Egipiti. Yehova wangukambiya Mozesi kuti: ‘Farawo watindivwiya cha. Ndimulenji, iyu walutengi kumsinji wa Nile. Uluti ndipu ukamukambiyi kuti chifukwa chakuti wakana kuzomereza ŵanthu ŵangu kuti aluti, maji ngosi nga mumsinji wa Nile ngasambukengi ndopa.’ Mozesi wanguvwiya ndipu wanguluta kuchikumana ndi Farawo. Farawo wanguwona Aroni wachipuma maji nga mumsinji wa Nile ndi nthonga ndipu ngangusambuka ndopa. Msinji wo ungwamba kununkha, somba zingufwa ndipu mwengavi maji ngamampha ngakuti angamwa. Farawo wanguŵazomereza mbwenu cha Ayisraele kuti aluti.

 Pati pajumpha mazuŵa 7, Yehova wangutuma Mozesi kuti waluti so kwaku Farawo kuti wakamukambiyi kuti: ‘Asani uleka kuzomereza ŵanthu ŵangu kuti aluti, mucharu chosi cha Egipiti muzazengi amuchuwa.’ Aroni wangusoska nthonga yaki muchanya ndipu amuchuwa angwamba kuzaza charu chosi cha Egipiti. Ŵanthu angusaniya kuti munyumba zawu, pamabedi ngawu kweniso muviyaŵi vawu mwe amuchuwa. Peposi penga amuchuwa! Farawo wangukambiya Mozesi kuti wapemphi Yehova kuti amuchuwa wo amali. Farawo wangulayizga kuti wazomerezengi Ayisraele kuti aluti. Mwaviyo, Yehova wanguchitisa kuti muliri wo umali ndipu ŵanthu a ku Egipiti anguwunjika amuchuwa wo mu milu. Charu cho chingwamba kununkha. Kweni Farawo wanguŵazomereza mbwenu cha Ayisraele kuti aluti.

Pavuli paki, Yehova wangukambiya Mozesi kuti: ‘Aroni wapumi pasi ndi nthonga yaki ndipu fuvu lisambukengi tividononu takuluma.’ Nyengu yeniyo, peposi penga tividononu. Ŵanthu anyaki a ku Farawo angumukambiya kuti: ‘Muliri uwu watuliya kwaku Chiuta.’ Kweni Farawo wanguŵazomereza mbwenu cha Ayisraele kuti aluti.