MaIsrayeli akali kubelesegwa changuzu mubuzike. Jehova wakatuma Musa aAroni kuti bakabuzye Faro kuti: ‘Leka bantu bangu bakandikombe munkanda.’ Pesi Faro wakasandula munzila yakulisumpula kati: ‘Nsikwe ndaba pe azyaambwa aJehova alimwi nsikolekela maIsrayeli kuti ayinke.’ Mpawo Faro wakachita kuti babeleke imwi milimu miyumu loko. Pesi, Jehova wakali kuyanda kuyiisya Faro chiiyo. Ulizi na kuti Jehova wakachita biyeni? Wakeeta Zipenzyo zili 10 muEgepita. Jehova wakabuzya Musa kuti: ‘Faro talikundiswiilila pe. Junza kuseni unooli kumulonga waNayile. Wiinke ukamubuzye kuti maanzi woonse ali mumulonga waNayile alaba bulowa nkaambo wakasya bantu bangu kuti bayinke.’ Musa wakaswiilila Jehova mpawo wakiinka kuli Faro. Faro wakalangide Aroni chiindi Aroni naakawuma maanzi amumulonga waNayile ankoli yakwe alimwi kalikusanduka akuba bulowa. Mulonga wakatalika kununka, nswi zyakafwa alimwi maanzi akunywa taakachiliwo pe. Nikuba boobo, Faro taakazumizya maIsrayeli kuti ayinke.

 Nikwakayinda mazuba aali 7, Jehova wakatuma Musa kachibili kuti akabuzye Faro kuti: ‘Ikuti ubakasye bantu bangu kuzwa muEgepita, nyika yoonse iyoozula zichulwa.’ Aroni wakanyampula nkoli yakwe kujulu, mpawo nyika yoonse yakazula zichulwa. Zichulwa zyakazula mumaanda aabantu, amibbeda yabo, amundido. Zichulwa zyakazula nyika yoonse! Mpawo Faro wakabuzya Musa kuti akumbile Jehova kuti amaninsye chipenzyo eechi. Faro wakaamba kuti ulaalekela maIsrayeli kuti ayinke. Mpawo Jehova wakapa kuti chipenzyo eechi chimane alimwi bantu bakuEgepita bakasaanguna kukukula zichulwa zifwide akuzilundika mumalwi. Nyika yoonse yakali kununka. Nikuba boobo, Faro taakazumina kuti maIsrayeli ayinke.

Kuzwa waawo, Jehova wakabuzya Musa kuti: ‘Aroni awume nyika ankoli yakwe alimwi lusuko lulaba mansenya.’ Muchiindi chifwiifwi, nyika yoonse yakazula mansenya naa tuuka tuuluka tuluma. Beenzinyina baFaro bakamubuzya kuti: ‘Chipenzyo eechi chizwa kuli Leza.’ Nikuba boobo, Faro taakazumina kuti maIsrayeli ayinke.