Фараон израильчилерни кулдары кылып алгаш, оларга аар-берге ажылдар кылдыртып турган. Ынчангаш Иегова Моисей биле Аарон таварыштыр аңаа мынча дээн: «Мээң чонум ээн кургаг ховуга баргаш, меңээ тураскааткан байырлалды эрттирер кылдыр салывыт». Фараон: «Иегованың чүнү чугаалап турары меңээ хамаанчок. Израильчилерни салбас мен» — деп өрү көрдүнген. Ол оларга оон-даа хөй ажыл кылдыртып эгелээн. Ынчан Иегова фараонну кезедир деп бодап алган. Канчаар, билир сен бе? Ол Египетче он шаажылалды чоргускан. Иегова Моисейге мынча дээн: «Фараоннуң чаңы дедир, бак-тыр. Даң бажында ол Нил хемниң эриинге чедип кээрге, ол хем хан апаар деп аңаа чугаала. Чонумну салбаска, ону ынчаар кезедир мен». Моисей дыңнангыр бооп, фараонга чеде берген. Фараон хем эриинге турда, Аарон даянгыыжы-биле сугну соптарга, ол хан апарган. Хем дыка чүдек чыттыг апарып, балык-байлаңнары өлүп калган. Ону ижер арга чок болган. Ынчалза-даа фараон дөмей-ле израильчилерни салбаан.

 Чеди хонук эрткенде, Иегова Моисейни фараонче баргаш: «Мээң чонумну салбас болзуңза, Египетти пагалар үглей бээр деп чугаала» — дээн. Ынчалза-даа фараон Иегованы дыңнаваан. Аарон даянгыыжын өрү көдүрүптерге, чер бүрүзүнден пагалар үнүп эгелээн. Олар бажыңнарда-даа, орун-дөжекте-даа, аяк-савада-даа бар болган! Фараон ол шаажылалды Моисейни соксадырын чаннып дилеп, израильчилерни салыптарын аазаан. Иегова шаажылалды соксадыптарга, египетчилер өлүг пагаларны оваалай чыып турган. Оон кайда-даа дыка чыдыг болган. Ынчалза-даа фараон чонну салбаан.

Ооң соонда Иегова Моисейге: «Аарон даянгыыжы-биле черни соптарга, ооң довурак-доозуну ызырар хүлчүктер бооп хуула бээр» — дээн. Аарон ынчаар кылыптары билек, чер бүрүзүнден хүлчүктер ужуп келген. Фараоннуң чалчалары мынча деп турган: «Бо дээрге Бургандан кеземче-дир». Ынчалза-даа фараон бо удаа база израильчилерни салбаан.