Te israeletik mosoinbilik-a, la yichʼik sujel yuʼun te egipcioetik ta spasel tulan aʼtelil. Te Jehová la stikun te Moisés sok te Aarón ta stojol te faraón swenta jich ya yalbeyik: “Akʼa lokʼel te lum kuʼun swenta ya yichʼonik ta mukʼ ta jochol takin kʼinal”. Te faraón kʼax bayal la stoy sba sok jich la yal: “Ma jchʼuun te bin ya yal te Jehová. Ma xkakʼ lokʼel te israeletik”. Ta patil-abi, te faraón la sujtiklan ta spaselxan tulan aʼtelil. Pero te Jehová ay bin ya yakʼbey yil te faraón. ¿Bin la spas? La stikun lajunchajp wokolil ta Egipto. Te Jehová la yalbey te Moisés: “Maba ya schʼuunbon jkʼop te faraón. Ta sab ya xkʼot ta stiʼil mukʼul jaʼ Nilo. Baan sok albeya te ya xkʼatpʼuj ta chʼichʼ spisil te jaʼ ta skaj te maba yakʼoj lokʼel te lum kuʼune”. Te Moisés la schʼuun mantal jich bajtʼ yil te faraón. Te faraón la yil te bitʼil te Aarón la smaj sok snabateʼ te mukʼul jaʼ Nilo, jich kʼatpʼuj ta chʼichʼ te jaʼe. Jajch ta tuubel te mukʼul jaʼe, ma xjuʼ ta uchʼel sok laj te chayetike. Pero te faraón ma la yakʼ te ya xbajtʼik ta jochol takin kʼinal te israeletike.

 Jukeb kʼajkʼal ta patil, te Jehová la schaʼtikun bael te Moisés ta yalbeyel te faraón: “Teme maba ya awakʼ lokʼuk bael te lum kuʼune, te Egipto yame xnoj ta chʼuchʼetik”. Te bitʼil ma la schʼuun te faraón, te Aarón la stoy te snabateʼ, jich noj ta chʼuchʼetik spisil te lume. Noj ta chʼuchʼetik te snaike, te swayibike, soknix ta splatoik te nojel ta weʼelile... ¡Bayuknax ayik! Te faraón la yalbey te Moisés: “Kʼanbeya te Jehová te yakuk slokʼes bael te chʼuchʼetik ta jtojol. Ta patil ya kakʼ lokʼuk bael te israeletike”. Jich te Jehová la skom te wokolile, te egipcioetik bayal ta bus la stsobik te chʼuchʼetik lajemikixe. Kaj ta tuubel te lumkʼinale, pero jaʼnix jich te faraón ma la yakʼ lokʼel te lume.

Ta patil, te Jehová la yalbey te Moisés: “Te Aarón akʼa smaj sok snabateʼ te lume. Te kʼalal jich ya spase, yame xkʼatpʼuj ta bikʼtal usetik te tsʼubil lume”. Jich kʼot ta pasel, chiknaj tal ta bayuk bayal bikʼtal usetik te tiʼotik te ants winiketike. Ay chaʼoxtul egipcioetik la yalbeyik te faraón: “¡Te wokolil ini, jaʼ talem ta stojol te Diose!”. Pero, te faraón jaʼnanix jich ma la yakʼ lokʼel te israeletike.