Va Isareli va enda oku kisikiwa oku talavaya calua ndapika. Yehova wa tuma Mose la Arone oku enda ku Fareo lesapulo liokuti: ‘Tuma omanu vange oco va ende okuti va ndi fendela vekalasoko.’ Fareo lepela wa tambulula hati: ‘Si tava kovina Yehova a popia, handi vali, si ecelela okuti va Isareli va enda.’ Kuenje Fareo wa va kisika oku talavaya vali calua. Yehova wa nõlapo oku yambula Fareo. Wa kũlĩha ndomo Yehova a ci linga? Eye wa nena Ekũi Liafengi Kegito. Yehova wa sapuila Mose hati: ‘Fareo ka kasi oku ndi yevelela. Komẽle Fareo enda Kolui Nilu. Kuende kokuaye kuenda u sapuila hati, omo eye ka tavele oku eca afendeli vange, ovava osi o Volui Nilu a pongoloka osonde.’ Mose wa pokola kuenje wa enda ku Fareo. Fareo wa mola ndomo Arone a veta ovava o Volui Nilu lombueti yaye kuenje ovava osi o volui a pongoloka osonde. Olui lua fetika oku lẽha, olombisi via fa kuenda ka mua kaile ovava oku nyua volui Nilu. Pole, lopo Fareo ka tavele oku eca va Isareli oco va ende.

 Noke yoloneke epanduvali, Yehova wa tuma vali Mose oco a ende ku Fareo lesapulo liokuti: ‘Nda kua tavele oku eca omanu vange, ofeka yosi Yegito yi yuka lovinonga.’ Arone wa votola ombueti yaye kuenje vofeka yosi mua fetika oku yuka ovinonga. Omanu va sanga ovinonga volonjo viavo, volohama viavo kuenda patiyela avo. Kua kala ovinonga kovitumãlo viosi! Fareo wa sapuila Mose oco a pinge ku Yehova okuti efengi liaco li imuha. Fareo wa likuminyile okuti eca va Isareli oco va ende. Omo liaco, Yehova wa imula efengi liaco kuenda va Egito va fetika oku ongolola olondunda viovinonga via fa. Kuenje ofeka ya fetika oku lẽha. Pole, lopo Fareo ka tavele oku eca omanu oco va ende.

Omo liaco, Yehova wa sapuila Mose hati: ‘Arone a vete voneketela yo posi lombueti yaye kuenje oneketela yi pongoloka olohamue.’ Vepuluvi liaco kovitumãlo viosi kua fetika oku yuka olohamue vialua. Omanu vana va tiamẽla ku Fareo va popia vati: ‘Efengi eli lia tunda ku Suku.’ Pole, lopo Fareo ka tavele oku eca va Isareli oco va ende.