An mga Israelita ginpwersa pagtrabaho hin mabug-at sugad nga uripon. Ginsugo ni Jehova hira Moises ngan Aaron nga isumat ha Paraon ini nga mensahe: ‘Palakta an akon katawohan basi makagsingba hira ha akon ha kamingawan.’ Pero hambog nga binaton an Paraon: ‘Waray ako labot han ginsiring ni Jehova, ngan diri ko palalakton an mga Israelita.’ Tapos, ginpabug-at pa gud han Paraon an ira trabaho. Gintutdoan ni Jehova hin leksyon an Paraon. Maaram ka ba kon paonan-o? Ginpahinabo ni Jehova an Napulo nga Peste ha Ehipto. Hiya nagsiring kan Moises: ‘An Paraon diri namamati ha akon. Ha aga, makadto hiya ha Salog Nilo. Kadto ngan sidnga hiya nga tungod kay diri niya gintutugotan nga lumakat an akon katawohan, an tubig han Nilo magigin dugo.’ Sinugot hi Moises ngan kumadto ha Paraon. Nakita han Paraon han ginbalbag ni Aaron han iya tungkod an Nilo, ngan an salog nagin dugo. Nagtikang magbaho an tubig, nagkamatay an isda, ngan waray na limpyo nga irimnon tikang ha Nilo. Pero waray la gihapon palakta han Paraon an mga Israelita.

 Paglabay hin pito ka adlaw, ginpabalik ni Jehova hi Moises ha Paraon basi isumat ini nga mensahe: ‘Kon diri mo palakton an akon katawohan, mapupuno hin pakla an Ehipto.’ Gin-alsa ni Aaron an iya tungkod ngan napuno hin pakla an tuna. Sumulod ito ha mga balay, higdaan, ngan ha mga yahong. Bisan diin may pakla! Ginsidngan han Paraon hi Moises nga makimalooy kan Jehova nga paundangon ini nga peste. Nagsaad an Paraon nga palalakton niya an mga Israelita. Salit igin-undang ni Jehova an peste, ngan damu ka pundok nga patay nga pakla an natirok han mga Ehiptohanon. Nagbaraho an bug-os nga tuna. Pero waray la gihap palakta han Paraon an katawohan.

Tapos hi Jehova nagsiring kan Moises: ‘Kinahanglan ibalbag ni Aaron an iya tungkod ha tuna, ngan an tapotapo magigin tagnok.’ Nagkaada dayon mga tagnok ha bisan diin. An pipira nga katawohan han Paraon nagsiring: ‘Tikang ha Dios ini nga peste.’ Pero waray la gihap palakta han Paraon an mga Israelita.