Andevo Israelita aby io, sady niforsen̈a niasa mare. Jehovah nan̈iraka Mosesy ndreky Arona nivolan̈a tamy Farao: ‘Alifasa olonaka aby io, baka hanompo zaho amy tany paiky an̈y.’ Farao nizahozaho, hoizy: ‘Zaho tsy mijery raha volan̈iny Jehovah zen̈y, baka io Israelita aby io tsy halefako.’ Nataony nahaimare asany Israelita aby io. Tiany Jehovah ho hainy Farao fa izy mahery ankitin̈y. Hainao karakory nataony? Nisy antambo folo nalefany ta Ezipta. Ho Jehovah tamy Mosesy: ‘Tsy nitandren̈y volan̈aka foeky Farao. Mandihana aminany amy Ten̈aranony Neily an̈y anao amaray maraindrain̈y. Volàn̈a aminany fa hiova lio ranony Neily, fotony tsy nalefany vahoakanaka.’ Nitandrin̈esany Mosesy zen̈y ke nandeha tamy Farao tan̈y izy. Farao nizaha Arona namepiky rano io tamy tongozonany. Rano io niova lio, nanjary nahimbo, salakady tsy nety nigiahin̈y foeky. Naty loko jiaby tao. Mbala tsy nalefany Farao fo Israelita aby io.

 Nafaka fito andra, Jehovah nan̈iraka Mosesy nimpody tamy Farao tan̈y, nivolan̈a: ‘Anao koa mbala tsy mandefa olonaka, hataoko feno radaka a Ezipta eto.’ Arona nampanonga tongozonany, ke nanjary feno radaka ta Ezipta. Feno na tan̈aty tran̈olo, na tamy fandrian̈a, na tan̈atiny kovety. Tany jiaby! Farao nan̈iraka Mosesy niangavy Jehovah han̈adoso raha io. Izy nivolan̈a fa halefany iro Israelita aby io. Ke najanon̈o Jehovah antambo io. Iro Ezipsianin̈y aby io amy zay namory fatiny radaka aby io. Nahimbo tany jiaby. Mbala tsy nalefany Farao fo vahoaka aby io.

Ho Jehovah tamy Mosesy: ‘Iraha mamepiky tongozonany amy tany Arona, baka hanjary moko laposiera.’ Niaraka tamy zen̈y feno moko tany jiaby. Nisy piasany Farao nivolan̈a: ‘Antambo ty baka amy Zan̈ahary.’ Mbala tsy nalefany Farao fo Israelita aby io.