Faro amangi aYisaraere ngbaome i mangisunge ni akanga. Yekova akedi Moize na Arona fuo Faro na gi pangbanga re: ‘Mo mbu gimi aboro wa ka i ndu ka iriso re ngbakungbo yo.’ Faro akaragapai na rukö nga: ‘Sunge tire na gupai Yekova agumbaha re te, na mi ambunga aYisaraere i ndu te.’ Faro ki mangiyo ngbaome i mangisunge ni bakerehe. Yekova nika yugopai ayugo fu Faro. Mo ini wai du? Ko aye na Ambusa Bawe kurii Ezipeta. Yekova aya fu Moize: ‘Faro agianga gupai mi agumbaha te. Wiso, ko nika du pati gu di nga Nire. Mo ndu fuo ko ki ya fuko, mbiko wa ko aidanga ka mbu gimi aboro i ndu ya, gu ime nga ga Nire naabaha nika satihe ni kure.’ Moize agisangba Yekova na ki ndu fuo Faro. Faro aru kinaho kaa bi wai Arona anaara Nire na gako ngbondo, na gu di re ki satihe ni kure. Gu di re atona ka fũ, atĩo akpi, ka gene adunga wa ka i gbia wene ime Nire yo ka mbiraha ya. Faro aká kindi ka mbu aYisaraere i ndu.

 Fuo poso sa kusa, Yekova akedi Moize berewe fuo Faro na gi pangbanga re: ‘Ka mo ambunga gimi aboro i guari ya, Ezipeta nika hi be adari.’ Arona ki tumba gako ngbondo kuari, na adari ki tona ka hi ringara. Aboro ki bi adari rogo gayo abambu, rii gayo abarame, na rogo gayo asaani. Adari ki rengbe na arago dunduko! Faro ki ya fu Moize ko zungodi Yekova tipa gu mbusa re go kusayo. Faro ki kidohe nga ko nika mbu aYisaraere ambu i ndu. Sidu, Yekova arugusi gu mbusa re, aEzipeto ki dungura gugudo adari kurii agugudo adari. Ringara kini fũ gbegberẽ. Ono tie, Faro aaidanga ka mbu aboro i ndu te.

Fuo gure, Yekova ki ya fu Moize: ‘Si naida Arona nari nvutu sende na gako ngbondo, na nvutu nika satihe ni azari.’ Nibasa, azari ki rengbe na arago dunduko. Bete ga Faro aboro ki ya fuko: ‘Agi ambusa re naye be Mbori.’ Ono wa si avura du wo, Faro aambunga aYisaraere i ndu te.