Musa gikud Harun gicidho i bang’ Farao pi niyero ire wec ma Mungu uoro kogi, giwacu kumae: ‘Kan iweko ngo dhanu para gicidhi, abikelo ulwang’ini ma rac i ng’om Misiri.’ Udul mir ulwang’ini ma rac ugam umondo i udi mi Jumisiri ceke, gimondo i udi mi julonyo ku mi jucan de. Misiri zoo upong’ kud ulwang’ini. Ento ulwang’ini ubino mbe i ng’om mi Gocen, kaka ma Juisrael gibedo i ie. Masendi maeni ku mange m’udong’ umulo kum Jumisiri kendgi. Farao uyero ni Musa kumae: ‘Kwai Yehova udar ulwang’ini maeni cen, ci wubicidho ku juthu.’ Re saa ma Yehova udaru ulwang’ini, Farao ulokere. Nyo masendi maeno umio ponji ni Farao?

Yehova uwacu kumae: ‘Ka Farao uweko ngo dhanu para gicidhi, twoyo bimaku lim ceke mi Misiri, man gibitho.’ Urwonde, lim ucaku tho. Ento lim mi Juisrael utho ngo. Re asu Farao ukwero magwei niweko nyithindho mir Israel.

I ng’eye, Yehova uyero ni Musa nia edok kendo i bang’ Farao, man ecok vuru ecoi i kor yamu. Kinde m’ecoye, vurune ugam udoko ni utur, man uturne uumo ng’om zoo. I ng’eye epoto i kum Jumisiri ceke. Utur maeno ukwodo vur i kum Jumisiri ku lei migi kpo. Asu Farao uweko ngo nyithindho mir Israel gicidhi.

 Yehova udok uoro Musa kendo nia ecidh eyer ni Farao kumae: ‘Fodi asu ibekwero niweko dhanu para gicidhi? Urwo, pei bicwii iwi ng’om Misiri.’ De andha urwonde Yehova uoro pei, eoro morpolo man mac. Nwang’u fodi polo umor ungo kumeca i Misiri. Yen ku piny mi podho ceke unyothere, ento i Gocen lembe maeno utimere ngo. Farao uyero ni Musa kumae: ‘Kwai Yehova ujig masendi maeni! I ng’eye abiweko wubicidho.’ Re saa ma pei man koth ujik, Farao uloko paru pare.

I ng’eye Musa uyero kumae: ‘Kawoni bonyo bicamu piny moko ci ma pei uweko.’ E bonyo ma wendgi kwanere ngo upoto iwi piny mi podho man iwi yen, gicamu pinje pet. Farao uwacu ni Musa kumae: ‘Kwai Yehova udar bonyo maeni cen.’ Re kadok Yehova udaru bonyo de, asu Farao ucerere.

Yehova ugam uyero ni Musa kumae: ‘Riei cingi malu i polo.’ Musa ugam urieyo cinge, e wang’ acel piny ucido bii. Mudho uumo ng’om mi Misiri bii pi bang’ adek, man jucopo neno ngo kum dhanu kunoke kum piny moko ci. Ento der ubino nuti kaka ma nyithindho mir Israel gibino i ie kende.

Farao uwacu ni Musa kumae: ‘Wucopo cidho karacelo ku juthu. Re lim mwu ceke bidong’ kakeni.’ Musa uyero ire kumae: ‘Wabicidho ku lim mwa pilembe wabiwok thierogi ni Mungu mwa.’ Kwinyo ugam uopo i Farao magwei. Ekok i wigi kumae: ‘Wuai cen kud i wang’a! Kan abinenowu kendo keni, abinegowu cen.’