Moisesampi Aaronampejj Diosan arunakapwa faraonar akham sasin yatiyapjjäna: ‘Markajar jan khitkätajja, tábano sat achusiri chhichhillankhanakwa markamar apayanëjja’ sasa. Waranq waranqa chhichhillankhanakaw egipcionakan utapar mantäna, qamirïpasa pobrëpasa taqenin utaparuw markpachan phoqantäna. Ukampis israelitanakajj jakapkäna uka Gosén markanjja, janiw mayas utjkänti. Uka pusïr plagasa, ukjjar jutkäna uka plaganakasa, egipcionakarukiw tʼaqesiyäna, israelitanakarojj janiw kamachkänsa. Ukatwa faraonajj Moisesar akham sasin ruwtʼäna: ‘Aka chhichhillankhanak chhaqtayjjañapatak Jehová Diosar ruwtʼam, ukatsti sarjjapjjasmawa’ sasa. Diosajj chhaqtayjjäna ukhajja, faraonajj janiw khitañ munjjänti. ¿Faraonajj Diosar istʼañ qhepat yateqjjpachänti?

Jehová Diosajj akham sänwa: ‘Faraonatï markajar jan khitkanejja, egipcionakan animalanakapajj usuntasaw jiwarapjjani’ sasa. Qhepürojj cheqapuniw Diosan arupajj phoqasïna, israelitanakan animalanakapakiw jan usuntapkänti. Ukhampachas jan kasusir jaqëtap laykojj janiw istʼkänti.

Diosajj Moisesar sänwa: ‘Faraonan ukar sarasin qhell altor willtanim’ sasa. Willtäna ukhajja, qhellajj wal polvotatäna, taqe egipcionakaruw chʼamaktʼayarakïna. Wali usuyir llaganakwa egipcionakarus animalanakaparus mistuyäna. Ukampis faraonajj wasitat israelitanakar khitañ jan munkänti.

 Jehová Diosajj wasitatwa faraonar akham sañapatak Moisesar khitäna: ‘Jichhakamaw markajar jan khitktati, ukatwa qharürojj wal chhijchhintani’ sasa. Diosajj cheqapuniw chhijchhimpi, qʼejjo qʼejjompi, ninampi purintayäna. Janipuniw nayrajj ukham purintirïkänti, chhijchhejj alinak qʼal kʼutsüna. Gosén markansti janiw kunas paskänti. Ukatwa faraonajj akham säna: ‘Pasarjjañapatak Jehová Diosar mayim, sarjjapjjätawa’ sasa. Chhijchhis jallus pasarjjäna ukhajja, janiw khitañ munjjänti.

Ukatwa Moisesajj akham säna: ‘Jichhasti chhijchhejj jiltʼayki uka alinakjja, tʼiju tʼijunakaw qʼal manqʼantapjjani’ sasa. Waranq waranqa tʼiju tʼijunakaw jiltʼir alinak qʼal manqʼthapipjjäna. Ukatsti faraonajj akham sasaw Moisesar ruwtʼasïna: ‘Tʼiju tʼijunak chhaqtayjjañapatak Jehová Diosar ruwtʼam’ sasa. Jehová Diosajj tʼiju tʼijunak chhaqtayjjäna ukhajja, faraonajj janirakikiw Diosar istʼañ munjjänti.

Jehová Diosajj Moisesar akham sänwa: ‘Amparam altor loqtam’ sasa. Ukatsti jankʼakiw chʼamakthaptäna, wali chʼamakapunïnwa. Egipcionakajj kimsa urunakaw jan kuns uñjapkänti. Israelitanakan utanakapanakwa qhanajj utjäna.

Faraonajj Moisesar akham sänwa: ‘Jumasa markamasa sarjjapjjasmawa, animalanakamakwa akar jaytapjjäta’ sasa. Moisesajj sarakïnwa: ‘Diosar ofrendat loqtañatakiw animalanakaj apasipjjäjja’ sasa. Faraonajj wali colerataw jachʼat akham säna: ‘¡Saram akata! Mayamp uñjämajj jiwayämawa’ sasa.