Môsé bo Arôn ba bi ke legel Faraô nwin u Djob le: ‘Ibale u nwas bé litén jem le li kee, m’a om banjemje i loñ.’ Mauñ ma banjemje ma bi yon ikété mandap ma bôt ba Égiptô, mingwañ mi bôt ni diyeyeba. Loñ yosôna i ba nyonok ni banjemje. Ndi i loñ Gôsen, i het bon ba Israel ba bé, banjemje ba bé bé. Ibôdôl himala hi nyônôs ina, dimala di kahal ndigi tihba bon ba Égiptô botama. Faraô a kal Môsé le: ‘Soohe Yéhôva le a buñge banjemje. Litén joñ li nla ke.’ Ndi ngéda Yéhôva a bi buñge banjemje, Faraô a héñha mahoñol. Baa Faraô a nsôk a nok le a nlama nwas litén li Djob le li kee?

Yéhôva a bi kal le: ‘Ibale Faraô a nwas bé le litén jem li kee, bilém bi bon ba Égiptô bi nkwo kon, bi wo ki.’ Hilo hi bé noñ ha, bilém bi kahal wo. Ndi bilém bi bon ba Israel bi bé wo bé. Ndi to hala, Faraô a nai ni ndok, a nwas bé le litén li kee.

Mbus Yéhôva a kal Môsé le a témb yak Faraô ni le a leñ libu i ngii. Libu li bi yila lipum li biték, li yon ki ni mbebi, li kwél bon ba Égiptô bobasôna. Libu li, li bé boñ le bipoo bi pam bon ba Égiptô ni bilém gwap; bipoo bi, bi sôghege bo ngandak. Ndi to hala, Faraô a bi tjél nwas bon ba Israel le ba kee.

Yéhôva a bi témb a ep Môsé le a legel Faraô nwin le: ‘U ngi tjélék le litén jem li ke? Yani, nop  matan-ga a’ nôl loñ yosôna.’ Hilo hi bé noñ ha, Yéhôva a nôs nop matan-ga, ni mbambat, ni hié. Béba nop ipe i bé ngi tihba loñ Égiptô kiki nunu. Bebee le bie gwobisôna ni bibebela bi bi wo, ndik bie bi Gôsen gwon bi bi pei. Faraô a kal ki Môsé le: ‘Soohe Yéhôva le a mélés himala hini! Mbus, bébobasôna ni kee.’ Ndi, kiki nop matan-ga a mal, Faraô a témb a héñha mahoñol.

Mbus, Môsé a kal le: ‘Nano bitandi gw’a je bibebela nop matan-ga a nyék.’ Didun di bitandi di bi je bie gwobisôna bi bi yégle i nwom, i mbus nop matan-ga. Faraô a témb a soohe le: ‘Yemhe Yéhôva le a buñge bitandi.’ Ngéda Yéhôva a bi kiha bitandi, Faraô a kônde ndogop.

Yéhôva a kal ki Môsé le: ‘Sambal woo woñ i ngii.’ Kunda yada, ngii i hénd hiuu. Letee ni dilo daa, bon ba Égiptô ba bé ikété jiibe, ndi bon ba Israel bo, ba bé ikété mapubi.

Faraô a kal Môsé le: ‘We ni litén joñ ni kenek. Ndi ni yék bilém binan.’ Môsé a kal le: ‘Di nlama ke lôñni bilém gwés inyu boñ le di ti gwo Djob jés kiki sesema.’ Faraô a unup ngandak. A leñ nye le: ‘Nyodi me ha! Ibale me ntémb me tehe we, me nol we.’