Mose na Aarone baile kuli Farao pa kuti bamwebe ifyo Lesa abebele ukuyamweba. Lesa abebele ukuyaeba Farao ati: ‘Nga tawaleke abantu bandi baleya, nalaleta ifipobe mu calo conse.’ Mu mayanda yonse aya bena Egupti mwali fye ifipobe fyeka fyeka. Mu calo conse mwali ifipobe. Lelo mu calo ca Goshene umo abena Israele baleika mwena tamwali ifipobe. Farao alipapeete ati: ‘Lombeni Yehova ukuti afumye ifipobe mu calo. Nalaleka abantu benu baleya.’ Lelo ilyo Yehova afumishe ifipobe mu Egupti, Farao alikeene ukuleka abena Israele baleya. Bushe Farao ali no kuleka ukucita ifi alecita?

Yehova atile: ‘Farao nga taleke abantu bandi baye, ninshi inama shonse isha bena Egupti shikalwala kabili shikafwa.’ Ubushiku bwakonkelepo, inama shalitendeke ukufwa. Lelo inama sha bena Israele tashafwile. Na lyo line Farao alikeene ukuleka abena Israele baye mu kupepa Lesa.

Lyena Yehova aebele Mose ukuya na kabili kuli Farao no kupoosa imito mu muulu. Imito yasangwile ulukungu ica kuti mu mwela mwali fye ulukungu lweka lweka kabili lwaponene pa bena Egupti. Ulukungu lwalengele abena Egupti e lyo ne nama shabo ukukwata ifilonda. Na lyo line Farao alikeene ukuleka abena Israele baleya.

 Yehova aebele Mose ukubwelela kuli Farao no kumweba ati: ‘Bushe ucili ulekaana ukuleka abantu bandi baleya? Mailo nkaleta imfula ya mabwe mu calo.’ Ubushiku bwakonkelepo, Yehova aletele imfula ya mabwe, inkuba e lyo no mulilo. Imfula ya musango uyu tayabalile ailokapo mu Egupti. Ifimuti fyonse ne fimenwa fyalyonaike lelo mu Goshene mwena tamwali ifyaonaike. Farao atile: ‘Lombeni Yehova ukuti imfula ileke ukuloka! Nga yaleka, nalamuleka muye.’ Nomba ilyo fye imfula ya mabwe yalekele ukuloka, Farao alikeene ukubaleka baye.

Lyena Mose atile: ‘Makanta yalaisa kabili ikalya fyonse ifimenwa ifishaonaike ku mfula ya mabwe.’ Makanta iingi yalishile kabili yalilile ifimuti fyonse ne fyali mu mabala ifishaonaike ku mfula ya mabwe. Farao apapeete ati: ‘Lombeni Yehova ukuti afumye aba bamakanta mu calo.’ Nomba na lintu Yehova afumishepo ba makata, Farao alikeene ukuleka abena Israele baye.

Yehova aebele Mose ati: ‘Tambalika ukuboko kobe mu muulu.’ Ilyo line fye kwalifitile icine cine. Pa nshiku shitatu, abena Egupti tabalemona nangu cimo. Nomba ukwaleikala abena Israele kwena takwafitile.

Farao aebele Mose ati: ‘Iwe na bantu bobe kuti mwaya. Lelo mwisenda inama shenu.’ Lyena Mose atile: ‘Tufwile ukusenda inama shesu pa kuti tukayeshituula ilambo kuli Lesa wesu.’ Farao alifulilwe sana. Farao aebele Mose ati: ‘Fuma apa! Nga ukesa kuno na kabili nkakwipaya.’