Miadto si Moises ug Aaron sa Paraon aron sultihan siya sa giingon sa Diyos: ‘Kon dili nimo pagawson ang akong katawhan, magpadala kog mga langaw sa imong lugar.’ Dayon nanulod ang mga langaw sa tanang balay sa Ehipto. Ang tibuok lugar napuno sa langaw. Pero walay langaw didto sa Gosen nga maoy gipuy-an sa mga Israelinhon. Sugod niining ikaupat nga silot, ang mga Ehiptohanon lang ang naapektohan. Nagpakiluoy si Paraon: ‘Hangyoa si Jehova nga wad-on ang mga langaw, ug puwede nang mogawas ang mga Israelinhon.’ Pero nausab ang hunahuna sa Paraon dihang giwala na ni Jehova ang mga langaw. Kanus-a kaha magbag-o ang Paraon?

Si Jehova miingon: ‘Kon dili pagawson sa Paraon ang akong katawhan, magsakit ug mangamatay ang mga hayop sa mga Ehiptohanon.’ Pagkasunod adlaw, nangamatay ang mga hayop. Pero wala maapil ang mga hayop sa mga Israelinhon. Bisan pa niana, gahi gihapog ulo ang Paraon ug dili gyod niya pagawson ang mga Israelinhon.

Dayon gisugo ni Jehova si Moises sa pagsabwag ug abo sa hangin atubangan sa Paraon. Ug ang abo nahimong abog nga misagol sa hangin ug namilit sa tanang Ehiptohanon. Tungod sa abog, gihubagan ang tanang Ehiptohanon apil ang ilang mga hayop. Pero wala gihapon mosugot ang Paraon nga mogawas ang mga Israelinhon.

 Gipabalik ni Jehova si Moises sa Paraon aron isulti ang Iyang giingon: ‘Dili ba gyod nimo pagawson ang akong katawhan? Magpaulan ko ugma ug dagkong ice.’ Pagkaugma, nagpaulan si Jehova ug ice. Ug dihay dalugdog ug kalayo. Mao to ang pinakagrabe nga bagyo nga nahitabo sa Ehipto. Nangadaot ang tanang kahoy ug tanom, pero wala maapil ang Gosen. Si Paraon miingon: ‘Hangyoa si Jehova nga pahunongon kini! Dayon makabiya na mo.’ Pero, dihang mihunong na ang pag-ulan ug ice, nausab na pod ang hunahuna sa Paraon.

Dayon si Moises miingon: ‘Kaonon sa mga dulon ang tanang tanom nga nabilin.’ Ug mao kanay nahitabo. Nagpakiluoy ang Paraon: ‘Hangyoa si Jehova nga wad-on ang mga dulon.’ Pero bisag giwala na ni Jehova ang mga dulon, gahi gihapog ulo ang Paraon.

Si Jehova miingon kang Moises: ‘Iisa ang imong kamot sa langit.’ Dihadiha mingitngit ang langit. Tulo ka adlaw nga walay makita ang mga Ehiptohanon. Ang balay lang sa mga Israelinhon ang hayag.

Miingon ang Paraon kang Moises: ‘Makabiya na mo, pero ibilin ang inyong mga hayop.’ Mitubag si Moises: ‘Kinahanglan namong dad-on ang among mga hayop kay ihalad namo sila sa among Diyos.’ Suko kaayo ang Paraon. Misinggit siya: ‘Pahawa dinhi! Ayawg pakita nako kon dili ka gustong mamatay.’