Zambi yatuma Mose ni Arone kuli Falau hanga amulweze ngwenyi: ‘Nyi kuwechele atu jami hanga aye, mungutuma jiji anene-anene mu chifuchi cheswe.’ Jiji anji yanjila mu mazuwo ja A-Engitu, pichi ni yiswale. Chifuchi cheswe yichizala too ni jiji. Alioze ku chihela cha Ngoshone, kuze kwapwile A-Izalele, jiji kakaheteleko. Kuputuka ha luyinda yono wamuchiwana, ndo kulutwe, luyinda mweswe kahetele wika kuli A-Engitu. Falau yamba ngwenyi: ‘Liumbenu kuli Yehova hanga achize jiji wano. Atu jenu mahasa kuya kwo.’ Alioze muze Yehova achijile jiji jacho, Falau yalumuna manyonga jenyi. Shina Falau kalilongesele limwe fumbo?

Yehova yamba ngwenyi: ‘Nyi Falau kechele atu jami hanga aye, yimuna eswe A-Engitu mayiza ni kufwa.’ Ha tangwa lize liasulileho, yimuna yaputuka kufwa. Alioze yimuna a A-Izalele kakafwile. Chipwe chocho, nihindu Falau te machikalisa mbunge yenyi.

Hachino, Yehova yalweza Mose ahiluke kuli Falau hanga akuwe wuto mwilu. Wuto wacho yiwalumuka fufuta nawa yiyilitanda mu chifuchi cheswe cha Engitu. Fufuta yacho yanehene yilonda kuli A-Engitu eswe hamwe ni yimuna yo. Chipwe chocho, Falau yalituna kwecha A-Izalele hanga aye.

Yehova yatuma nawa Mose kuli Falau ni maliji wano ngwenyi: ‘Yena kuwazangile kwecha atu jami hanga aye kwo? Hamene,  mukukanoka vula wa chiwe mu chifuchi cheswe.’ Muze kwachile, Yehova yanokesa vula wa chiwe, njaji ni kahia. Yono kapwile vula mupi chinji yoze A-Engitu te kanda achimumona kama. Mitondo ni minda yeswe yayinongesa, alioze ya ku Ngoshone ka. Falau yamba ngwenyi: ‘Etenu kuli Yehova hanga ahwise luyinda yono! Mba, munuhasa kuya kwenu.’ Alioze muze luyinda wacho ahwile, Falau yalumuna manyonga jenyi.

Hachino, Mose yamba ngwenyi: ‘Haliapwila mapasu kumalia mitondo yeswe yize yasalanga ku vula wa chiwe.’ Mapasu anji yaputuka kulia mafwo eswe waze asalile ku mitondo ni mu minda. Falau yaliumba ngwenyi: ‘Etenu kama kuli Yehova hanga achize mapasu wano.’ Alioze chipwe muze Yehova achijile mapasu jacho, nihindu Falau yanunga ni kukalisa mbunge yenyi.

Yehova yalweza Mose ngwenyi: ‘Zundula kwoko lie mwilu.’ Hohene, mwilu mweswe yimula pwi ni milima. Ha matangwa atatu, A-Engitu kakahashile kumona ni chimwe chuma chipwe atu ni akwo. Alioze A-Izalele wika e apwile ni pangu ku mazuwo jo.

Falau yamba kuli Mose ngwenyi: ‘Yena ni atu je munuhasa kuya. Alioze hichikenu wika yimuna yenu.’ Mose yamba ngwenyi: ‘Twatamba kuya ni yimuna yetu hanga tukahase kuyilambula kuli Zambi yetu.’ Falau yevwa uli unji. Chocho, yahanga Mose ni kwamba ngwenyi: ‘Toka mu meso jami! Nyi musoloka nawa, mungukushiha.’