Musa ni Arɔn tagara Ala ka cii fɔ Farahuna ye ko: ‘N’i ma ne ka mɔgɔw bila ka taga, ne bena limɔgɔbabaw bila ka na jamana kɔnɔ.’ Limɔgɔbaba caaman donna Ezipitikaw ka soow kɔnɔ, fantanw fara faamanw kan. Jamana yɔrɔ bɛɛ fara o limɔgɔw la. Nka o limɔgɔ si tun tɛ yen Gosɛn, yɔrɔ min na Israɛldenw tun siginin be yen. K’a daminɛ tɔɔrɔ naaninan nin ma, tɔɔrɔ tɔɔw bɛɛ ye Ezipitikaw dɔrɔn lo sɔrɔ. Farahuna ye Musa deli sɔbɛ la ko: ‘Jehova deli a k’o limɔgɔw yɔrɔ janya an na. I ka mɔgɔw be se ka taga.’ Nka Jehova ye limɔgɔw yɔrɔ janya u la tuma min na, Farahuna y’a ka miiriyaw yɛlɛma. Yala Farahuna bena hakili sɔrɔ wa?

Jehova ko: ‘Ni Farahuna ma ne ka mɔgɔw bila ka taga, Ezipitikaw ka bɛgɛnw bena bana ka sa.’ O dugusagwɛ, bɛgɛnw y’a daminɛ ka sa. Nka Israɛldenw ka bɛgɛnw tun tɛ sara. Farahuna y’a tulo gwɛlɛya halibi. A ma sɔn ka mɛnni kɛ Jehova fɛ.

O kɔ, Jehova y’a fɔ Musa ye ko a ka kɔsegi Farahuna fɛ ani ka buguri ta k’a fili sanfɛ. O buguri kɛra gwangwan ye ka jigi Ezipitikaw bɛɛ kan. O kɛra sumunin juguw ye Ezipitikaw n’u ka bɛgɛnw bɛɛ kan. O bɛɛ n’a ta, Farahuna banna ka Israɛldenw bila ka taga.

Jehova ye Musa ci tugun Farahuna fɛ k’a fɔ a ye: ‘I bele t’a fɛ ka n’ ka mɔgɔw bila ka taga wa? Sini,  sanbɛrɛ bena jigi jamana kɔnɔ.’ O dugusagwɛ, Jehova ye sanbɛrɛ, sanpɛrɛn ani tasuma bila ka jigi. O ɲɔgɔn tun ma deli ka kɛ Ezipiti jamana kɔnɔ. Yiriw ni sumanw bɛɛ tiɲɛna. Nka o ma se Gosɛn dugu la. Farahuna ko: ‘Jehova deli a k’a kɛ o sanbɛrɛ be lɔ. O kɔ, aw be se ka taga.’ Nka sanbɛrɛ ni sanji lɔra tuma min na dɔrɔn, Farahuna y’a ka miiriyaw yɛlɛma.

O kɔ, Musa ko: ‘Sisan, sanbɛrɛ ma aw ka furaburu minw halaki, tɔɔnw lo bena u bɛɛ ɲimi.’ Fɛɛn minw bɛɛ tun tora forow kɔnɔ ani yiriw kan, tɔɔn miliyɔn caaman y’u bɛɛ ɲimi k’u ban. Farahuna ye Musa deli ko: ‘Jehova deli a ka tɔɔn nunu bɔ an kun na.’ Jehova ye tɔɔnw yɔrɔ janya u la, nka hali o kɔ, Farahuna bele y’a tulo gwɛlɛya.

Jehova y’a fɔ Musa ye ko: ‘I bolo wuli sanfɛ.’ Yɔrɔ bɛɛ barila ka dibi kosɔbɛ. Ezipitikaw tun tɛ se ka foyi wala mɔgɔ si ye fɔɔ tile saba. Yeelen tun be Israɛldenw dɔrɔn lo fɛ.

Farahuna y’a fɔ Musa ye ko: ‘E n’i ka mɔgɔw be se ka taga. Nka a’ y’aw ka bɛgɛnw to yan.’ Musa ko: ‘An ka ɲi ka taga n’an ka bɛgɛnw ye walisa k’u saraka an ka Ala ye.’ Farahuna dimina kosɔbɛ. A pɛrɛnna ko: ‘Taga ka bɔ ne ɲɛɛ kɔrɔ! Ni n’ y’i ye yan tugun, n’ bena i faga.’