Aleʼejüshi Moisés nüchikuaʼa nümaa Aarón eemüin faraón, naküjaka nümüin tü nümakat Maleiwa: «Müleka nnojorüle püjütüin tapueulose, tantireerü taapana jünainmüin». Tia müsü aka saaʼin wanee merüle, aisü sütaʼa. Watta maʼin saalii taapana ekerotoko nepialuʼumüin na egipciokana, antüsü nümüin eekai maʼletsein otta eekai washirüin. Arülayaai neʼe taapana suluʼu tü mmakat Egipto. Shiasaʼa suluʼu tü mmakat Gosén, eejanale kepiain na israeliitakana, nnojotsü eein taapana. Tia pienchikat kasa mojusü otta tü waneirua nüntirüinjatkat Jeʼwaa, naya neʼe antaka amüin na egipciokana, nnojotsü antüin namüin na israeliitakana. Achuntashaatashi Faraón nümüin Moisés: «Puchunta nümüin Jeʼwaa süpüla nüsünneʼerüinjatüin tü taapanakat, tajüteetka tü nupueulosekat». Nüsünneʼerapa Jeʼwaa tü taapanakat, nnojoishii nüjütüin faraón na israeliitakana. ¿Ayateeiche Faraón macheʼein?

Nümaka joo Jeʼwaa: «Müleka nnojorüle nüjütüin Faraón tü tapueulosekat, ayuuijeerü jee outeerü tü namüʼlüinkalüirua». Waneemüin kaʼi, ekeraajüsü tü nümakat Jeʼwaa, nnojotpajaʼa jamajüin namüʼlüin na israeliitakana. Sutuma yaletüin naaʼin faraón, ayatüshia nia macheʼein. Nuluwataaka Jeʼwaa Moisés nüchikuaʼa eemüin faraón süpüla najapatüinjatüin paliʼi otta nijitüinjatüin shia iipünaamüin. Kaitaka tü paliʼikat sümaa shiiʼiranajaain suluʼu müin aka saaʼin sükalira mma, yooisü otta eʼikaajüsü nata na egipciokana otta tü mürütkalüirua. Ayatapajaʼa Faraón nnojoluin nüjüteein na israeliitakana.

Nuluwataain Jeʼwaa Moisés nüchikuaʼaya süpüla nümüinjachin nümüin faraón: «¿Jamüsü nnojotka püjüteein tapueulose? Keʼichiiseerü tatuma tü juyakat  wattaʼa». Waneemüin kaʼi, nüʼitiraka Jeʼwaa wanee juya, keʼichiisesü, katürülasü otta chuwatüsü siki iipünaajee. Keemashaatasü maʼin tia, nnojotsü eeirüin wanee kasa eekai müin aka saaʼin tia chaa Egipto. Ajaʼttüsü wunuʼulia sutuma otta tü pünajüt eejatkat chaa Egipto, nnojotpajaʼa shia antüin suluʼumüin tü mmakat Gosén. Nümaka Faraón nümüin Moisés: «Puchunta nümüin Jeʼwaa süpüla shiyüüʼülaain tü juyakat, tajüteenaka na israeliitakana». Ayüüʼülaa müsia tia juyakat nutuma Jeʼwaa. Nnojotpajaʼa nikeraajüin faraón nünüiki.

«Ajaʼtteerü shikajüin tü kaashapakat tü pünajüt apütaakat süchikijee tü juyakat», nümakalaka Moisés. Süntaka watta maʼin saalii kaashapa, ajaʼttüsü shikajüin süpana tü wunuʼuliakalüirua otta tü pünajüt apütaakat paala. Nümakalaka faraón nümüin Moisés: «Puchunta nümüin Jeʼwaa nüsünneʼeraiwa tü kaashapakat». Nüsünneʼerapa Jeʼwaa tü kaashapakat, ayatüshia neʼe faraón macheʼein.

Nümaka Jeʼwaa nümüin Moisés: «Piyalera pajapü». Kojokalaka maʼin tü piyuushikat nutuma Jeʼwaa, nnojotsü kasain neʼrüin na egipciokana soʼu apünüin kaʼi. Nnojotpajaʼa piyuushin nepialuʼu na israeliitakana.

Nümaka faraón nümüin Moisés: «Puʼuna mmata namaa na israeliitakana, jüpüta yaʼayaa tü jümüʼlüinkalüirua». Nusoutaka Moisés nümüin: «Wamaainjatü tü wamüʼlüinkalüirua süpüla wasülajüin shia nümüin chi Wamaleiwasekai». Jashichika maʼin faraón sünain maa: «¡Puʼuna yaajee! Toʼuteerü aaʼin pia püleʼejüle püchikuaʼa».