NUPINPLỌN 20
Azọ̀nylankan Ṣidopo He Bọdego Lẹ
Mose po Aalọn po yì Falo dè nado dowẹn Jiwheyẹwhe tọn na ẹn dọ: ‘Eyin a ma jo omẹ ṣie lẹ do bọ yé yì, n’na do supọ̀ adínọ lẹ hlan aigba lọ ji.’ Supọ̀ adínọ susugege sọ gbaṣinyọ́n owhé Egiptinu lẹ tọn, yèdọ owhé adọkunnọ po wamọnọ po tọn. Aigba lọ pete wá gọ́ na supọ̀ adínọ lẹ. Amọ́, supọ̀ adínọ depope ma to aigba Goṣẹni tọn ji, fihe Islaelivi lẹ nọ nọ̀. Bẹsọn azọ̀nylankan ẹnẹtọ ehe ji, Egiptinu lẹ kẹdẹ wẹ nọ jiya azọ̀nylankan lọ lẹ tọn. Falo vẹvẹ dọ: ‘Mì vẹ̀ Jehovah dọ ni de supọ̀ ehelẹ sẹ̀. Omẹ mìtọn lẹ gán yì.’ Ṣigba, whenue Jehovah de supọ̀ adínọ lọ lẹ sẹ̀, Falo diọlinlẹn. Be ayiha Falo tọn na wá mọnú gbèdopo ya?
Jehovah dọmọ: ‘Eyin Falo ma jo omẹ ṣie lẹ do bọ yé yì, kanlin Egiptinu lẹ tọn lẹ na jẹazọ̀n bo kú.’ To wunkẹngbe, kanlin lọ lẹ jẹ kúkú ji. Amọ́, kanlin Islaelivi lẹ tọn lẹ ma kú. Etomọṣo, Falo gbẹ́ to tasinyẹn bo ma jlo na jogbe.
Enẹgodo, Jehovah dọna Mose dọ ni gọyì Falo dè bo dlan afín do jẹhọn mẹ. Afín lọ lẹzun afínfín bo gbayipe gbọn jẹhọn mẹ bosọ ṣinyọ́n Egiptinu lẹpo ji. Afínfín lọ hẹn nutitẹ̀ fifiẹ lẹ tọ́n do agbasa go na Egiptinu lẹ po kanlin yetọn lẹpo po. Mahopọnna enẹ, Falo gbẹ́ dọ Islaelivi lẹ ma na yì.
Jehovah sọ vọ́ do Mose hlan Falo dè po owẹ̀n ehe po dọmọ: ‘A ma jlo na tún omẹ ṣie lẹ dote janwẹ ya? To osọ, kẹ́njikun na ja do aigba lọ ji.’ To wunkẹngbe, Jehovah do kẹ́njikun, hẹviosò po miyọ́n po hlan. Kẹ́njikun mọnkọtọn ma ko ja pọ́n to Egipti. Atin lẹpo wẹ kú bọ jinukun lẹ gble, ṣigba nude ma wà dehe tin to Goṣẹni lẹ. Falo dọmọ: ‘Mì vẹ̀ Jehovah dọ ni doalọtena onú ehelẹ! Enẹgodo, mì gán yì.’ Ṣigba, tlolo he kẹ́njikun lọ doalọte, Falo sọ diọlinlẹn.
To whenẹnu, Mose dọmọ: ‘Todin, owẹ̀n lẹ na dù ogbé depope he kẹ́njikun lọ pò dai.’ Owẹ̀n livi susu sọ wọ̀ wá bo dù nuhe pò to ogle lẹ mẹ podọ to atin lẹ ji. Falo vẹvẹ dọmọ: ‘Mì vẹ̀ Jehovah dọ ni de owẹ̀n lọ lẹ sẹ̀.’ Amọ́, etlẹ yin to whenue Jehovah ko de owẹ̀n lọ lẹ sẹ̀ godo, Falo gbẹ́ to tasinyẹn.
Jehovah sọ dọna Mose dọ: ‘Dlẹnalọ towe hlan agahomẹ.’ Agahomẹ sọ dozinvlu hadopo. Na azán atọ̀n, Egiptinu lẹ ma gán mọ nudepope. Islaelivi lẹ kẹdẹ wẹ tindo hinhọ́n to owhé yetọn lẹ gbè.
Falo dọna Mose dọ: ‘Hiẹ po omẹ towe lẹ po gán yì. Amọ́, mì jo kanlin mìtọn lẹ do.’ Mose gblọn dọmọ: ‘Mí dona hẹn kanlin mítọn lẹ yì, na mí nido yí yé do sanvọ́ hlan Jiwheyẹwhe mítọn.’ Homẹgble Falo taun. E sọ dawhá dọmọ: ‘Tọ́n sọn nukọn ṣie! Eyin n’sọ mọ afọ towe tofi, n’na hù we janwẹ.’
“Mìwlẹ nasọ mọ vogbingbọn to dodonọ po mẹylankan po ṣẹnṣẹn, to mẹhe to Jiwheyẹwhe sẹ̀n po mẹhe ma to sinsẹ̀n ẹn po ṣẹnṣẹn.”—Malaki 3:18
A Gán Sọ Pọ́n Hosọ Ehelẹ
TITO NUPINPLỌN TỌN NA SINSẸ̀N-BIBASI WHẸNDO TỌN
Jiwheyẹwhe Do Mose Hlan Egipti
Mose po Aalọn do adọgbigbo hia to whenue yé yì dọhona Falo huhlọnnọ lọ. Yí nuplọnmẹwe ehelẹ bo dọhodo yé ji to pọmẹ hẹ whẹndo towe.
