Moses na Aron va karaera Farao ombuze yaMukuru nave tja: ‘Indu tji u hina okuyandjera otjiwaṋa tjandje okuyenda, Ami me hindi omaze moEngipte.’ Omaze ya hita mozondjuwo zOvaengipte, zovatumbe novasyona. Ehi arihe re urire omaze. Posiya mehi raGosen, Ovaisrael kaave kara ka kwa ri omaze. Okuutira potjiwonga otjitjaine hi, oviwonga aavi hihamisa Ovaengipte uriri. Farao we riheka rukwao na tja: ‘Riheka ku Jehova ma isepo omaze nga. Otjiwaṋa tje me hindi tji yende.’ Posiya indu Jehova tja isapo omaze, Farao wa panḓa okuyandjera Ovaisrael okuyenda. Hapo Farao mape ya tjiri e rihongo nao?

Jehova wa tja: ‘Ndovazu Farao ke nokuyandjera otjiwaṋa tjandje kutja tji yende, ovinamuinyo avihe vyOvaengipte mavi vere navi koka.’ Eyuva nda kongorera ko, ovinamuinyo vya uta okukoka. Posiya ovinamuinyo vyOvaisrael kavina pu vya koka. Farao ngunda aa panḓa okuyandjera Ovaisrael kutja ve yende.

Okuzambo Jehova wa raera Moses kutja ma yende rukwao ku Farao nu ma kayumbe omutwe meyuru. Omutwe mbwi wa rira oruuma ndwe uriri meyuru naru kahaama kombanda yOvaengipte. Oruuma ndwi rwa pitisa Ovaengipte avehe novinamuinyo vyawo oviraro mbyaavi hihamwa tjinene. Nakombanda yanao, Farao wa panḓa okuyandjera kutja Ovaisrael ve yende.

Jehova wa hinda Moses rukwao ku Farao nombuze Ye ndji: ‘Ngunda mo panḓa okuyandjera otjiwaṋa kutja  tji yende? Muhuka maku roko ozombawe zombura.’ Eyuva nda kongorera ko, Jehova wa hinda ozombawe zombura, otuṱuṱumo nomuriro. Ihi tja ri otjivepo otjinamasa tjinene ovature vaEngipte tji ve hi ya rora okumuna komurungu wanao. Omiti avihe novihape vya nyonwa, posiya imbi vyovature vaGosen kavi munine otjipo. Farao wa tja: ‘Riheka ku Muhona kutja ma isepo otjiwonga hi! Okuzambo mu yende.’ Posiya tjimanga ozombawe zombura nombura tji ya isa okuroka, Farao ngunda aa panḓa okuyandjera Ovaisrael kutja ve yende.

Okuzambo Moses wa tja: ‘Nai ozombahu maze ri ovikunwa ngamwa avihe mbya hupu kotjivepo nozombawe zombura.’ Ozombahu ozengi za rya oviṋa avihe mbya hupa ko momahi womakunino na komiti. Farao we riheka na tja: ‘Riheka ku Muhona kutja ma isepo ozombahu nḓa.’ Posiya nandarire Jehova tja za nokuisapo ozombahu, Farao ngunda wa ri notjiuru otjikukutu.

Jehova wa raera Moses a tja: ‘Yerera eke roye kuṱa keyuru.’ Tjimanga tja za nokutjita nao, eyuru arihe ra zozera. Oure womayuva 3, Ovaengipte kaave yenene okumuna otjiṋa poo omundu. Mozondjuwo zOvaisrael uriri omu mwa ri omarambe.

Farao wa tja nai ku Moses: ‘Ove notjiwaṋa tjoye mamu yenene okuyenda. Posiya ovinamuinyo vyeṋu vyeseye mba.’ Moses wa tja: ‘Ovinamuinyo vyetu matu sokutwaerera kutja tu kevipunguhire Mukuru wetu.’ Farao wa pindika tjinene. Eye wa ravaera na tja: ‘Twendeye, zapweye pu ami! Tji mbe mu munu rukwao me mu zepa.’