Laj Moises ut laj Aaron xkohebʼ rilbʼal laj Faraon re xkʼebʼal chaq re li esil li kixtaqla chaq li Yos: «Wi inkʼaʼ nakaakanabʼ chi xik lintenamit, tintaqla ebʼ li kas saʼ li tenamit». Ebʼ li kas aʼin chanchanebʼ li bʼujl malaj li raxyaat, li nekeʼtiwok. Ebʼ li bʼujl aʼin chi mil keʼxchʼik ribʼ saʼ rochochebʼ laj Egipcio joʼ bʼihom joʼ nebʼaʼ. Kinujak chi bʼujl chixjunil li tenamit. Abʼan, saʼ li naʼajej Gosen, bʼarwiʼ wankebʼ chaq ebʼ laj Israel, maakʼaʼ junaq rehebʼ li xul aʼin. Li xka rahilal ut li keʼchalk moqon kaʼajwiʼ ebʼ laj Egipcio keʼxkʼe saʼ chʼaʼajkilal, abʼan maakʼaʼ keʼxkʼul ebʼ laj Israel. Laj Faraon kixtzʼaama re laj Moises: «Ye re li Jehobʼa naq trisi ebʼ li bʼujl, ut chirix chik aʼan txik li xtenamit». Abʼan, naq li Jehobʼa kirisi li rahilal, laj Faraon inkʼaʼ kixbʼaanu li kixye. Ma nakaaye naq laj Faraon tixjal xnaʼlebʼ saʼ junaq kutan?

Chirix chik aʼan, li Jehobʼa kixye: «Wi laj Faraon inkʼaʼ tixkanabʼ chi xik lintenamit, ebʼ li xketomq ebʼ laj Egipcio teʼyajerq ut teʼkamq». Wulajaq xyeebʼal aʼin naq kikʼulmank li kixye li Jehobʼa, abʼan ebʼ li xketomq ebʼ laj Israel maakʼaʼ keʼxkʼul. Usta kikʼulmank aʼin, laj Faraon moko kixkanabʼ ta chi xikʼ li tenamit xbʼaan naq jip saʼ xxik.

Joʼkan naq, li Jehobʼa kixye re laj Moises naq tsutqʼiiq wiʼ chik rikʼin laj Faraon ut tixkut li cha chiru iqʼ. Li cha kisutqʼiik choʼq poqs ut kixjekʼi ribʼ saʼ iqʼ ut kitʼaneʼk saʼ xbʼeenebʼ laj Egipcio. Li poqs aʼin kixbʼaanu naq chirixebʼ laj Egipcio ut chirixebʼ li xxul t-elq li xox, li jwal ra. Abʼan, laj Faraon kixye wiʼ chik rehebʼ laj Israel naq inkʼaʼ teʼruuq chi xik.

 Li Jehobʼa kixtaqla wiʼ chik laj Moises chi rilbʼal laj Faraon re naq tixkʼe re li esil aʼin: «Ma toj maajiʼ nakaawaj xkanabʼankil chi xik lintenamit? Wi joʼkan, wulaj tinbʼaanu naq ttʼaneʼq li saqbʼach». Wulajaq xyeebʼal aʼin naq li Jehobʼa kixtaqla chaq li saqbʼach, li kaaq ut li xaml. Kʼajoʼ xrahil kixkʼul li tenamit Egipto! Kisachk chixjunil ebʼ li ninqi cheʼ ut ebʼ li awimq, abʼan maakʼaʼ kixkʼul li naʼaj Gosen. Tojaʼ naq, laj Faraon kixye: «Ye re li Jehobʼa naq trisi aʼin, ut texruuq chi xik». Abʼan, naq kixaqliik li saqbʼach ut li habʼ, laj Faraon inkʼaʼ kixbʼaanu wiʼ chik li kixye.

Joʼkan naq laj Moises kixye: «Anaqwan teʼchalq li saakʼ ut teʼxwaʼ li awimq li kixkanabʼ li saqbʼach». Ebʼ li saakʼ aʼin chanchanebʼ li nimla chiliʼ. Chi miyon ebʼ li saakʼ keʼxwaʼ chixjunil li kikanaak chiruhebʼ li cheʼ ut ebʼ li awimq. Laj Faraon kixtzʼaama re laj Moises: «Ye re li Jehobʼa naq trisi ebʼ li saakʼ arin». Abʼan naq li Jehobʼa kirisi ebʼ li saakʼ, laj Faraon jwal kijipoʼk wiʼ chik saʼ xxik.

Moqon chik, li Jehobʼa kixye re laj Moises: «Taqsi laawuqʼ saʼ choxa». Tojaʼ naq kiqʼoqyinoʼk chixjunil li tenamit. Ebʼ laj Egipcio maakʼaʼ chik nekeʼruuk rilbʼal chiru oxibʼ kutan. Kaʼajwiʼ ebʼ laj Israel kutan saʼebʼ li rochoch.

Laj Faraon kixye re laj Moises: «Laaʼat ut laatenamit naru texxik, abʼan teekanabʼ leeketomq». Laj Moises kixye re: «Tento tqakʼam ebʼ li ketomq re xkʼebʼal choʼq xmayej li Qayos». Jwal kijosqʼoʼk laj Faraon ut kixjap re: «Elen arin! Wi twil wiʼ chik aawu, tatinkamsi».