Moses naAron ova li va ya kuFarao noku mu lombwela etumwalaka laKalunga tava ti: ‘Ngeenge ito lekele oshiwana shange, ohandi ka tumina oshilongo omawashe.’ Momaumbo Ovaegipti, kutya nee oipuna ile ovafyoona, omwa li mu yadi omawashe. Oshilongo ashishe osha li shi yadi omawashe, ashike muGosen omo mwa li Ovaisrael kamwa li omawashe. Ehandukilo etine ola li ashike la kuma Ovaegipti. Farao okwa li a pula a ti: ‘Indileni Jehova opo a kufe po omawashe. Ame ohandi ka lekela oshiwana shoye.’ Opo nee Jehova okwa li a xulifa po omawashe, na Farao okwa li a lundulula osho a li a popya. Mbela Farao okwa li ngoo te ke lihonga oshilihongomwa efiku limwe?

Jehova okwa ti: ‘Ngeenge Farao ita lekele oshiwana shange, oimuna yOvaegipti otai ka kwatwa komukifi ndele tai fi.’ Efiku la landula ko, oimuna oya li ya hovela okufya. Ashike oimuna yOvaisrael inai fya. Ndele nande ongaho, Farao okwa li a kukutika omutima waye noka li a ninga omalunduluko.

Opo nee Jehova okwa li a lombwela Moses a shune kuFarao nokweekela omute mombada. Omute owa li wa shituka ondwi oyo ya kala ya twima muEgipti ashishe. Ondwi oyo oya li ya etela Ovaegipti aveshe noimuna yavo oidinda. Ashike, natango Farao ka li a efa Ovaisrael va ye.

Jehova okwa li a tuma vali Moses kuFarao netumwalaka laye tali ti: ‘Natango ino hala okulekela oshiwana shange? Mongula, moshilongo otamu ka lokwa eemawe.’ Efiku la landula ko, Jehova okwa li a tuma eemawe, omipwalakato  nomundilo. Oshikungulu osho osha li shinene noinashi monika nande onale muEgipti. Omiti noikunomwa aishe oya li ya hanaunwa po, ashike yaavo va li muGosen kaya li ya hanaunwa po. Farao okwa li vali a pula ta ti: ‘Indileni Jehova a loteke eemawe, opo mu dule okuya.’ Ndele diva ashike eshi eemawe da oka nodula ya sheka, Farao okwa li a ninguluka.

Opo nee Moses okwa ti vali: ‘Oimeno aishe oyo ya li ya xupa po keemawe otai ka lika po koshipaxu.’ Oshipaxu shihapushihapu osha li sha lya po keshe shimwe osho sha li sha xupa momapya nokomiti. Farao okwa li va li a pula ta ti: ‘Indileni Jehova a kufe po oshipaxu.’ Ashike nokuli naashi Jehova a xulifa po oshipaxu, Farao okwa li natango a kukutika omutima waye.

Jehova okwa li a lombwela Moses a ti: ‘Ulika eke loye keulu.’ Diva okwa li kwa laula fokofoko. Ovaegipti kava li ve wete ko nandenande oule womafiku atatu. Ovaisrael ovo ashike va li ve li mouyelele.

Farao okwa li a lombwela Moses a ti: ‘Indeni noshiwana shoye. Fiye i po ashike oimuna yeni.’ Moses okwe mu nyamukula a ti: ‘Otu na okuya noimuna yetu opo tu dule oku ka yambela Kalunga ketu.’ Farao okwa li a handuka neenghono. Okwa li e mu hanyaukila ta ti: ‘Dja po pwaame! Ngeenge onde ku mono vali, ohandi ku dipaa.’