Mozé ni Alá ai mu tula o njimbu ia Nzambi kua Falaó: ‘Se ngua’ié kueha o mundu uami kuia, ngi tumikisa nzungule ia jihamue mu ixi ioso ia Ijitu.’ Nzugule ia Jihamue ja bokona mu jinzo j’akua Ijitu, kixi o jimvuama mba o jingadiama. Ixi ioso iezalele ni jihamue. Maji mu ixi ia Ngozene mua tungile akua Izalaiele ki mu kexile jihamue. Mu kumateka ni dibhebhu dia kauana, o mabhebhu a kuamene ngó akua Ijitu. Falaó ua diondo: ‘Diondela Jihova phala kubhuisa o jihamue joso jiji. Mundu uê uanda-ia kiá.’ Maji kioso Jihova kia bhuisa o jihamue, Falaó ua lungulula o kibanzelu kiê. O kuila Falaó ueji dilonga disá mu ima íii?

Jihova uambe: ‘Se Falaó kehé o mundu uami kutunda, o iama ioso ia-nda kuata uhaxi, ni kufua.’ Mu kizuua kia kaiela o iama ioso ia mateka o kufua. Maji o iama ia akua Izalaiele, ki ia fu. Né muene kiki, Falaó ka mesenene kueha o mundu ua Izalaiele. Jihova uambela Mozé phala kuvutuka kua Falaó, phala kutakula uthókua bhulu. O uthókua ua kituka fufutila, iu ua dimuange ku akua Ijitu. O uthókua ua bhekela mabhumbu ku mikutu ia akua Ijitu, ni ku ibhaku iâ. Ni kubhuma kuoso, Falaó kehela akua Izalaiele ku tunda.

Mu kiki Jihova ua tumikisa dingi Mozé kua Falaó ni njimbu Iê: ‘Né muene kiki ua mu dituna kueha o mundu uami kutunda? Mungu kua-nda noka mvula ia matádi mu ixi.’ Mu ku kia-ku, Jihova ua tumikisa  matádi, jinzaji ni túbhia. Iii o mvula ia dikota ia bhitile mu ixi ia Ijitu. Mixi ioso mu mábhia a i buikisa ku kitembu. Falaó uambe: ‘Diondela Jihova phala a bhuise o kitembu kiki! Se u ki bhanga, ngi kuehe kiá.’ Maji kioso o mvula ia matádi ki ia zubha o kunoka, Falaó ua lungulula dingi o kibanzelu kiê.

Mozé uambe: ‘O kihoho kia-nda dia o idima ioso ia subhuka ku kitembu.’ O mazunda a kihoho, adi o idima ioso ia subhuka ku mábhia. Falaó ua diondela: ‘Diondela Jihova phala a bhuise o kihoho kioso kiki.’ Maji né muene kioso Jihova kia bhuisa o kihoho kiokio, Falaó kehé o mundu kutunda.

Jihova uambela Mozé: ‘Sununa o lukuaku lué u lu talese ku diulu.’ Mu kithangana kienhókio o diulu diedi buiií. Mu izuua itatu, akua Ijitu ka tenene kumona kima mukonda dia kitombe. Maji akua Izalaiele ngó akexile ni mukengeji mu jinzo jâ.

Falaó uambela Mozé: ‘Eie ni mundu ué ndenu kiá. Maji o ibhaku ienu ia-nda xala.’ Mozé uambe: ‘O ibhaku ietu tua-nda iambata, phala ku i satela Nzambi ietu.’ Falaó ua kexile ni njinda iavulu. Ua dikola: ‘Tundenu kupholo iami! Se ngi mi mona dingi bhu pholo iami nga-nda mi jibha.’