Mozis ɛn Erɔn bin go tɛl Fɛro Gɔd in mɛsej we se: ‘If yu nɔ lɛf mi pipul dɛn fɔ mek dɛn go, a go sɛn big big flay dɛn na di land.’ Bɔku bɔku big big flay dɛn go na di Ijipshian dɛn os dɛn, to di wan dɛn we jɛntri ɛn to di wan dɛn we po. Big big flay dɛn bin de ɔlsay na di land. Bɔt di big big flay dɛn nɔ bin de na Goshɛn, usay di Izrɛlayt dɛn bin de. Frɔm we di nɔmba 4 bad bad tin stat fɔ apin, na di Ijipshian dɛn nɔmɔ dɛn bin de apin to. Fɛro bin se: ‘Duya, beg Jiova fɔ pul dɛn big big flay dɛn kɔmɔt na ya. A go lɛf una pipul dɛn mek dɛn go.’ Bɔt we Jiova bin pul di big big flay dɛn, Fɛro bin chenj in maynd. Fɛro bin lan in lɛsin?

Jiova tɔk se: ‘If Fɛro nɔ lɛf mi pipul dɛn fɔ mek dɛn go, di Ijipshian dɛn animal dɛn go sik ɛn day.’ Di nɛks de, di animal dɛn bin bigin fɔ day. Bɔt di Izrɛlayt dɛn animal dɛn nɔ bin day. Bɔt pan ɔl dat, Fɛro nɔ bin gri fɔ du wetin Jiova se.

Dɔn Jiova bin tɛl Mozis fɔ go bak to Fɛro ɛn trowe ashis na di briz. Di ashis bin tɔn to dɔst, ɛn i bin go pan ɔl di Ijipshian dɛn. Di dɔst bin mek bwɛl dɛn kɔmɔt pan ɔl di Ijipshian dɛn ɛn dɛn animal dɛn. Pan ɔl dat, Fɛro nɔ bin gri fɔ lɛf di Izrɛlayt dɛn fɔ go.

 Jiova bin sɛn Mozis to Fɛro bak fo go tɛl am se: ‘Yu stil nɔ de gri fɔ lɛf mi pipul dɛn fɔ mek dɛn go? Tumara, ren we fiba smɔl smɔl ays blɔk dɛn go kam na di land.’ Di nɛks de, Jiova bin sɛn ren we fiba smɔl smɔl ays blɔk dɛn, tɛnda, ɛn faya. Dis kayn ren nɔ ɛva kam na Ijipt. Ɔl di stik dɛn ɛn plant dɛn bin pwɛl, bɔt di wan dɛn na Goshɛn nɔ bin pwɛl. Fɛro tɔk se: ‘Duya, beg Jiova lɛ i mek dis stɔp! Dɔn una kin go.’ Bɔt as di ren we fiba smɔl smɔl ays blɔk dɛn stɔp fɔ kam, Fɛro chenj in maynd.

Dɔn Mozis tɔk se: ‘Lokɔs dɛn go it ɔl di plant dɛn we di ren we fiba ays blɔk nɔ pwɛl.’ Bɔku bɔku lokɔs dɛn bin it ɔltin we bin lɛf na di fil ɛn stik dɛn. Fɛro tɔk se: ‘Duya, beg Jiova mek i drɛb di lokɔs dɛn.’ Bɔt ivin afta we Jiova bin drɛb di lokɔs dɛn, Fɛro bin stil trangayes.

Jiova bin tɛl Mozis se: ‘Es yu an ɔp.’ Wantɛm wantɛm, di skay bin dak. Fɔ tri dez, di Ijipshian dɛn nɔ bin ebul fɔ si ɛnitin ɔ ɛnibɔdi. Na di Izrɛlayt dɛn nɔmɔ bin gɛt layt na dɛn os dɛn.

Fɛro bin tɛl Mozis se: ‘Yu ɛn una pipul dɛn kin go. Bɔt una lɛf una animal dɛn na ya.’ Mozis tɔk se: ‘Wi fɔ kɛr wi animal dɛn go so dat wi go mek sakrifays dɛn to wi Gɔd.’ Dis bin mek Fɛro vɛks bad. I ala lawd wan se: ‘Kɔmɔt bifo mi! If a si yu igen, a go kil yu.’