Mi Muuse nda Elɔŋ kɔ dimul Felo yooŋgu Mɛlɛkaa aa: ‘Te a mel wanaa niaa ma kuɛ le, I cho tosa mi yɔluaa tiu silɔ o lɛŋnde numndeŋ niŋ.’ Okoŋ, mi yɔluaa tiu kpou o chiɛila waŋnda Ichipi niŋ, wana bala fondo ni, wana sulaa ni. Yɔluaa wa a tiuwaa ba o ba fee o lɛŋnde Ichipileŋ niŋ. Kɛ fondaŋ Isɔluɛiya wa wo diolaŋ aa Kuusiɛŋ, yɔluaa ve loŋ te. Kanduŋ a kpundɛ hiɔɔloo hoo kɔ bii a la tɔlaŋ, waŋnda Ichipi kinɛi o wa laŋ tusioo choo ni. Mi Felo dimi aa: ‘Yandii, nyɔɔlu Chɛhowa mbo feŋal naa yɔluaa haa. Kɔ a wanaa numnda.’ Kɛ mɛɛ Chɛhowa faŋa yɔluaa kaŋ, mi Felo siŋga yiyaŋ ndɔɔ. Baa Felo wa pa nyɛ pɛɛku o keŋ niŋ?

Mi Chɛhowa dimi aa: ‘Te Felo kɛɛ pɛ le wanaa niaa malɔɔ ma kuɛ, I cho tosa mi chɔluaa waŋnda Ichipi kpou del a naalaŋ ma vi.’ Diimandɔɔ, mi chɔluaa ndaa kandu wuoo, kɛ chɔluaa Isɔluɛiya opilɛ bɛɛ vi lɛ. Kɛ a koŋ kpou, Felo wa wɔ bolle kalaleŋ tosaa, nduyɛ o mel Isɔluɛiya ma kuɛ le.

Okoŋ, mi Chɛhowa dimul Muuse le mbo miiŋgu o Felo lo pila, nduyɛ mbo kɔ wuu pultaŋ o hueiye niŋ. Mi pultaŋ la simnuŋ chundoo, mi chundu koŋ pia o hueiye niŋ, mbo tiu Ichipiaŋnda choo silɔ. Mi chundoo hoo tosa mi pauvii wɔɔŋ wɔɔŋnde del waŋnda Ichipi kpou choo a chɔluaa ndaa. Kɛ a koŋ kpou, Felo chɛl vɛlɛ le Isɔluɛiya malɔɔ ma kuɛ le.

Mi Chɛhowa miŋgi vɛlɛ Muuse pila naa Felo chua a yooŋgoo hoo aa: ‘A cho wɔ kiɔɔ le wanaa niaa  malɔɔ ma kuɛ? Siɔdii, I cho tosa mi looŋ kpuŋgbaŋ deli o lɛŋndeŋ ndeŋ niŋ.’ Diimandɔɔ, mi Chɛhowa yɔŋ looŋ kpuŋgbaŋ, taŋndaŋ, a yiŋndeŋ. Nduyɛ, lepilɛ bɛɛ i waa nuaa ndii yɔŋnuŋndɔ o lɛŋnde Ichipileŋ niŋ te. Mi yɔmnde a tɔlɔɔla ndalaŋ kpou la tambu. Kɛ naa Isɔluɛiya wa Kuusiɛŋ nda, nyɛ o nyɛ yɔŋnuŋ loŋ te. Mi Felo dimi aa: ‘Yandii, nyɔɔlu Chɛhowa mbo faŋa naa kpundɔɔ hoo choo, okoŋ mi la kuɛ.’ Dimioo nuaa mi looŋ kpuŋgbaŋ muŋ a piɔɔ pɛŋgi, mi Felo siŋga vɛlɛ yiyaŋ ndɔɔ.

Okoŋ, mi Muuse dimi aa: ‘Tɔlɔɔ kɛ kɛ looŋ kpuŋgbaŋ mɛi, soonuaa cho laŋ dio paku.’ Tɔlɔɔ o tɔlɔɔ ndoo lo o chiɔɔŋ ndaŋ niŋ, mi soonuaa o miiliɔŋndaŋ niŋ dia paku. Mi Felo dimi vɛlɛ aa: ‘Nyɔɔlu Chɛhowa mbo feŋal naa soonuaa haa.’ Mi che bɛɛ mi Chɛhowa faŋa soonuaa kaŋ, kɛ Felo wa wɔ hiouwɔɔ lachi a bolle kalaleŋ tosaa.

Mi Chɛhowa dimul Muuse aa: ‘Heelu ba numndo choo choo.’ O lepilɛ niŋ kpe, mi choo piimiaa kpilo kpilo. Le palɛi ndii yaa, waŋnda Ichipi ndaa chi nyɛ o nyɛ le, nduyɛ ndaa chi vɛlɛ wana o wana le. Isɔluɛiya kinɛi ndaa nɔ nyɛ wawoŋndo o la nda lo chiɛiniŋ ni.

Mi Felo dimul vɛlɛ Muuse aa: ‘Num ni, wanaa numnda ni, la kɔ mi la mɛi chɔluaa nyaa nanuŋ.’ Kɛ mi Muuse dimul ndu aa: ‘Ŋ cho lakɔŋnɔŋ a chɔluaa naa miŋ kɔ soli nda salaa o Mɛlɛka naa lo.’ Mi Felo tambu kɔllo tau tau. Okoŋ mbo deŋul Muuse aa: ‘Faŋaŋ ya o hɔl! Te I che num niŋ naŋ pɛ, I cho num diyɔɔ.’