တၢ်မၤလိ ၂၀
တၢ်နးတၢ်ဖှီၣ်လၢအဂၤဃုခါ
ကစၢ်ယွၤမၢ စီၤမိၤၡ့ဒီးစီၤအၤဟရိၣ် လဲၤတဲဘၣ်စီၤပၤဖၤရိၤလၢ– ‘နမ့ၢ်တပျဲလဲၤယပှၤဂီၢ်မုၢ်န့ၣ် ယကဒုးလီၤပကိာ်ဃၢ်လၢ ကီၢ်အဲၤကူပတူးအပူၤလီၤ.’ ပကိာ်ဃၢ်န့ၣ်မ့ၢ်ဝဲ သၣ်ဘုလါတကလုာ်လၢ အအ့ၣ်ပှၤကညီလီၤ. ပကိာ်ဃၢ်တဖၣ်အံၤ လဲၤနုာ်လီၤဆူပှၤအဲၤကူပတူးဖိလၢ အကဲဒိၣ်မ့ၢ်ဂ့ၤ အဖှီၣ်မ့ၢ်ဂ့ၤအဟံၣ်ပူၤလီၤ. ဒီးအိၣ်ဝဲလၢ ကီၢ်အဲၤကူပတူးဒီကီၢ်ညါလီၤ. ဘၣ်ဆၣ် ပကိာ်ဃၢ်တဖၣ်အံၤ တအိၣ်ထီၣ်ဝဲလၢ ကီၢ်ကိၡ့ၣ်လၢ ပှၤအံၣ်စရ့လးဖိအိၣ်ဝဲအလီၢ်ဘၣ်. စးထီၣ်လၢတၢ်နးတၢ်ဖှီၣ်လွံၢ်ခါတခါ တုၤလၢအကတၢၢ်န့ၣ် ဘၣ်ဝဲထဲပှၤအဲၤကူပတူးဖိတဖၣ်လီၤ. အဃိ စီၤပၤဖၤရိၤတဲဝဲလၢ– ‘ဃ့ကညးယဟိဝၤယွၤလၢ ကမၤလီၤမၢ်ကွံာ် တၢ်ဖိဃၢ်တဖၣ်အံၤမီၤ. ကစၢ်ယွၤမ့ၢ်မၤလီၤမၢ်ကွံာ်ဝဲန့ၣ် ယကပျဲလဲၤပှၤအံၣ်စရ့လးဖိလီၤ.’ ဘၣ်ဆၣ် ဖဲယဟိဝၤယွၤမၤလီၤမၢ်ကွံာ် ပကိာ်ဃၢ်တဖၣ်အံၤအခါ စီၤပၤဖၤရိၤအသးဆီတလဲဝဲလီၤ. မ့ၢ်စီၤပၤဖၤရိၤကမၤန့ၢ်တၢ်မၤလိ တဘျီဘျီဧါ.
ယဟိဝၤယွၤတဲဘၣ် စီၤမိၤၡ့လၢ– ‘စီၤပၤဖၤရိၤ မ့ၢ်တပျဲ ယပှၤဂီၢ်မုၢ်န့ၣ် ပှၤအဲၤကူပတူးဖိ အဆၣ်ဖိကီၢ်ဖိတဖၣ် ကဆိးက့ဒီးကသံဝဲလီၤ.’ လၢခံတနံၤ ပှၤအဲၤကူပတူးဖိအဆၣ်ဖိကီၢ်ဖိသံဝဲလီၤ. ဘၣ်ဆၣ် မ့မ့ၢ်ပှၤအံၣ်စရ့လးဖိတခီ အဆၣ်ဖိကီၢ်ဖိတသံဝဲဘၣ်. ဘၣ်ဆၣ် စီၤပၤဖၤရိၤတသးအိၣ်ပျၢ်ကွံာ် ကစၢ်ယွၤအပှၤဂီၢ်မုၢ်ဒံးဘၣ်.
ဝံၤဒီး ယဟိဝၤယွၤမၢဝဲစီၤမိၤၡ့ လဲၤကဒီးဆူစီၤပၤဖၤရိၤအအိၣ် ဒီးဖှံထီၣ်ဖၣ်ဆါကမူၣ်လၢ ကလံၤကျါလီၤ. ဖၣ်ဆါကမူၣ်အံၤ ကဲထီၣ်တၢ်ကမူၣ်လၢ ကလံၤကျါ ဒီးလီၤဘၣ်ဝဲလၢ ပှၤအဲၤကူပတူးဖိတဖၣ်အလိၤလီၤ. တၢ်ကမူၣ်အံၤ ဒုးအိၣ်ထီၣ်ဝဲ တၢ်ဝ့လၢပှၤအဲၤကူပတူးဖိအလိၤ ဒီးလၢအဆၣ်ဖိကီၢ်ဖိအလိၤလီၤ. ဘၣ်ဆၣ် စီၤပၤဖၤရိၤတပျၢ်ကွံာ် ပှၤအံၣ်စရ့လးဖိဒံးဘၣ်.
ယဟိဝၤယွၤမၢလီၤကဒီး စီၤမိၤၡ့ဒ်သိးကလဲၤတဲဘၣ်စီၤပၤဖၤရိၤလၢ တၢ်ကစီၣ်အဂီၢ်လီၤ. စီၤမိၤၡ့တဲဘၣ်စီၤပၤဖၤရိၤလၢ– ‘ခီဖျိလၢ နတပျၢ်
ယပှၤဂီၢ်မုၢ်ဒံးဘၣ်အဃိ ခဲမုၢ်ဆ့ၣ်သူၣ်ကလီၤတဲာ်လၢ ထံကီၢ်အပူၤလီၤ.’ လၢခံတနံၤန့ၣ် ယဟိဝၤယွၤဒုးလီၤဝဲသူၣ်, လီဖျးတၢ်ဒီးမ့ၣ်အူလီၤ. ကလံၤမုၢ်လၢအဟဲဆူၣ်ထဲအံၤန့ၣ် ပှၤအဲၤကူပတူးဖိတဖၣ် တထံၣ်ဘၣ်ဝဲနီတဘျီဘၣ်. သ့ၣ်ထူၣ်ဒီးတၢ်မုၢ်တၢ်ဘိတဖၣ် ဟးဂီၤကွံာ်ဝဲခဲလၢာ်လီၤ. ဘၣ်ဆၣ် လၢကီၢ်ကိၡ့ၣ်အပူၤန့ၣ် သ့ၣ်ထူၣ်ဒီးတၢ်မုၢ်တၢ်ဘိတဖၣ် တဟးဂီၤဝဲဘၣ်. ဒီးစီၤပၤဖၤရိၤတဲစီၤမိၤၡ့လၢ– ‘ဃ့ကညးယဟိဝၤယွၤလၢ ကမၤပတုာ်ကွံာ် တၢ်နးတၢ်ဖှီၣ်တခါအံၤ ဒီးယကပျဲလဲၤသုလီၤ.’ ဘၣ်ဆၣ် ဖဲသူၣ်ဒီးမူခိၣ်စူၤပတုာ်ကွံာ်ဝဲအခါ စီၤပၤဖၤရိၤအသးဆီတလဲဝဲလီၤ.လၢခံ စီၤမိၤၡ့တဲဘၣ် စီၤပၤဖၤရိၤလၢ– ‘တၢ်မုၢ်တၢ်ဘိလၢ အအိၣ်တ့ၢ်ဖဲ ကလံၤမုၢ်လီၤဝံၤအလီၢ်ခံန့ၣ် ဒွဲၣ်တဖၣ်ကအီၣ်ကွံာ်ဝဲခဲလၢာ်လီၤ.’ ဒွဲၣ်လၢအကကွဲၢ်တဖၣ် အီၣ်ကွံာ်ဝဲသ့ၣ်ထူၣ်ဒီး တၢ်မုၢ်တၢ်ဘိလၢ အအိၣ်တ့ၢ်လၢ စံာ်ပျီအပူၤခဲလၢာ်လီၤ. ဒီးစီၤပၤဖၤရိၤတဲဝဲလၢ– ‘ဃ့ကညးယဟိဝၤယွၤလၢ ကမၤလီၤမၢ်ကွံာ်ဒွဲၣ်တဖၣ်အံၤမီၤ.’ ဒီးယဟိဝၤယွၤ မၤလီၤမၢ်ကွံာ်ဒွဲၣ်တဖၣ်အံၤလီၤ. ဘၣ်ဆၣ် ဖဲကစၢ်ယွၤ မၤလီၤမၢ်ကွံာ်ဝဲ ဝံၤအလီၢ်ခံန့ၣ် စီၤပၤဖၤရိၤတပျဲလဲၤ ပှၤအံၣ်စရ့လးဖိဒံးဘၣ်.
ယဟိဝၤယွၤတဲဘၣ်ကဒီး စီၤမိၤၡ့လၢ– ‘ယူာ်ထီၣ်နစုဆူမူခိၣ်တက့ၢ်.’ တဘျီဃီန့ၣ် တၢ်ခံးလီၤဝဲလၢကီၢ်အဲၤကူပတူးအပူၤ သၢသီလီၤ. ဖဲန့ၣ်အခါ ပှၤအဲၤကူပတူးဖိတဖၣ် ကွၢ်တၢ်တဖျါနီတမံၤလၢၤဘၣ်. မ့မ့ၢ်လၢ ပှၤအံၣ်စရ့လးဖိတဖၣ် အိၣ်တၢ်လီၢ်န့ၣ် တၢ်ကပီၤဝဲလီၤ.
စီၤပၤဖၤရိၤတဲဘၣ် စီၤမိၤၡ့လၢ– ‘နၤဒီးပှၤအံၣ်စရ့လးဖိတဖၣ် လဲၤသ့လံ. ဘၣ်ဆၣ် ပာ်တ့ၢ်သုဆၣ်ဖိကီၢ်ဖိတက့ၢ်.’ စီၤမိၤၡ့တဲဆၢအီၤလၢ– ‘ပကဘၣ်လဲၤစိာ် ပဆၣ်ဖိကီၢ်ဖိတဖၣ် ဒ်သိးပကလုၢ်ထီၣ်တၢ်လၢ ပကစၢ်ယွၤအအိၣ်လီၤသၢၣ်.’ စီၤပၤဖၤရိၤ သးပှံၢ်ထီၣ်တၢ်ဒိၣ်မးလီၤ. ဒီးအဝဲကိးဃါတၢ်ဒီး တဲဝဲလၢ– ‘ဟးထီၣ်ကွံာ်လၢယမဲာ်ညါခဲအံၤ. လၢခံတဘျီ ယမ့ၢ်ထံၣ်နၤန့ၣ် ယကမၤသံနၤလီၤ.’
“သုကဃၣ်သုသး ဒီးသ့ၣ်ညါနီၤဖး ပှၤတီဒီး ပှၤတတီဘၣ်အဆၢ, ပှၤလၢအမၤယွၤအတၢ်, ဒီးပှၤလၢအတမၤဘၣ် ယွၤအတၢ်အဆၢလီၤ.”—မၤလကံ ၃:၁၈