Mose yo Arone bayenda zayisa e nsangu za Nzambi kwa Faro vo: ‘Avo kusindika nkangu ame ko, mbwanzi itwika mu nsi yawonso.’ E mbwanzi zakota muna nzo za Esi Engipito, kiakala mvuama yovo nsukami. E nsi yawonso yazala ye mbwanzi. Kansi, muna nsi ya Ngosene ina Aneyisaele bazingilanga, ke mwakala mbwanzi ko. E vuku yayi, kwa esi Engipito kaka yakala. O Faro wavovesa Mose vo: ‘Dodokela Yave kimana kakatula e mbwanzi zazi. I bosi isindika o nkangu eno.’ Kansi, vava Yave kakatula e mbwanzi, Faro wasoba e ngindu. Nga Faro walongoka diambu mu mana kavanganga?

Yave wavova vo: ‘Avo Faro kasindikidi nkangu ame ko, e bulu yawonso ya esi Engipito kimbevo ibakama yo fwa.’ Muna lumbu kialanda, e bulu yawonso yayantika fwa. Kansi, e bulu ya Aneyisaele ke yafwa ko. Kana una vo i wau, Faro kazola sindika Aneyisaele ko. Yave Wavovesa Mose vo kenda kwa Faro yo mwanga o ntoto a mpolo kuna zulu. O ntoto a mpolo wakituka se mbundukutu yo mwangana muna Engipito yawonso. E mbundukutu yayi yavaikisa mputa zayingi muna esi Ngipito kumosi ye bulu yau. Kana una vo i wau, Faro kazola sindika Aneyisaele ko.

Yave watuma diaka Mose kwa Faro kamvovesa vo: ‘Nga kuzolele sindika nkangu ame ko? O mbazi mvul’a matadi inoka omu nsi.’ Muna lumbu  kialanda, Yave wanokesa mvul’a matadi, miandazi ye tiya. E yayi i mvula yasunda e ngolo ina esi Engipito bamona kala. E nti miawonso ye mbongo muna kiana yafwasakana, kansi ediadi ke diavangama ko kuna zunga kia Ngosene. Faro wavovesa Mose vo: ‘Dodokela Yave kimana kafokola e mvula yayi. I bosi, nwenda kweno.’ Kansi vava mvul’a matadi yafokoka, Faro wasoba e ngindu.

I bosi, Mose wavova vo: ‘Owau, makonko media konso nti misidi muna mvul’a matadi.’ Ulolo wa makonko madia e mbongo yawonso yasala muna kiana ye muna nti. Faro wavovesa Mose vo: ‘Dodokela diaka Yave kimana kakatula makonko mama.’ Kansi, vava Yave kakatula makonko, Faro wabadisa diaka ntima.

Yave wavovesa Mose vo: ‘Lambula koko kuna zulu.’ Vana vau, e zulu dilombokele. Mu lumbu tatu, esi Engipito ke bamonanga konso lekwa ko ngatu muntu. Kansi, Aneyisaele awonso mu ntemo bakala.

Faro wavovesa Mose vo: ‘Ongeye yo nkangu aku nwenda kweno. Kansi nusisa e bulu yeno kwaku.’ Mose wavova vo: ‘Tufwete nata e bulu yeto kimana twakela yo kimenga kwa Nzambi eto.’ Faro wafunga kikilu makasi. Wavovesa Mose vo: ‘Katuka oku ngina. Avo wizidi diaka, vonda ikuvonda.’