Mushe ni Aruni baya ku Faro ni kumutaluseza lushango lwa Mulimu kuli: ‘Haiba haulukululi batu baka, nikaluma mabuba mwa naha.’ Mabuba amañata-ñata akala kutaha mwa mandu a Maegepita, kwa bafumi ni babotona. Naha kaufela neitezi mabuba. Kono mwa naha ya Gosheni, ili mone bapila Maisilaele nekusina mabuba. Kukala feela ka koto yabune ye, neli feela Maegepita bane baamilwe ki likoto. Faro kiha ikupela kuli: ‘Hamukupe Jehova kuli aise mabuba kusili. Sicaba sahao sakona kuya.’ Kono Jehova hanaafelisize mabuba, Faro acinca munahano wahae. Kana Faro naakaituta sesiñwi?

Jehova kihaa li: ‘Haiba Faro halukululi batu baka kuli baye, lifolofolo za Maegepita lika kula ni kushwa.’ Lizazi lene litatami, limunanu zakala kushwa. Kono limunanu za Maisilaele nelisika shwa. Kusina taba ni zeo, Faro naasalati kuutwa mi naasalati kulukulula Maisilaele.

Cwale Jehova abulelela Mushe kukutela ku Faro ni kuyo hasa mufuse mwa moya. Mi mufuse waba liluli mwahalimu mi wawela Maegepita kaufela. Liluli nelitahisize litombo zebutuku kwa Maegepita kaufela ni limunanu zabona. Kono kusina taba ni zeo, Faro ahana kulukulula Maisilaele kuli baye.

Jehova hape aluma Mushe ku Faro, mi ayo mubuza kuli: ‘Kana usahana kulukulula batu baka? Kamuso pula ya simbwewewe ikanela  mwa Egepita.’ Habusa, Jehova anelisa pula ya simbwewewe, mishika, ni mulilo. Liñungwa leo nelisika bonwa kale fateñi mwa Egepita. Likota ni licalo kaufela nelisinyizwe kono isiñi mwa naha ya Gosheni. Faro ali: ‘Mukupe Jehova kuli afelise lika ze! Mi fo nika milukulula.’ Kono simbwewewe ni pula lisafela feela, Faro acinca munahano wahae.

Cwale Mushe ali: ‘Cwale nziye ikaca licalo kaufela zesiilwe ki pula ya simbwewewe.’ Nziye yeñata-ñata neicile lika kaufela zenesiyezi mwa masimu ni kwa likota. Faro kihaa li ku Mushe: ‘Kupa Jehova kuli aise nziye ye kusili.’ Kono nihaiba hamulaho wa Jehova kufelisa nziye, Faro ahana kulukulula Maisilaele.

Jehova ali ku Mushe: ‘Otololela lizoho lahao mwahalimu.’ Honafo feela, kwaba ni lififi lelituna mwahalimu. Ka mazazi amalaalu, Maegepita nebasa koni kubona nto yeñwi kamba kubonana. Kono Maisilaele bona nebanani liseli mwa libaka zabona.

Faro kihaa li ku Mushe: ‘Wena ni sicaba sahao mwakona kuya. Musiye feela limunanu zamina.’ Mushe kihaa li: ‘Lukaya ni limunanu zaluna kuli luyo fa Mulimu waluna matabelo.’ Faro naanyemile hahulu. Kiha huwa kuli: ‘Zwa fapilaa ka! Haiba nikubona hape, nika kubulaya.’