Mose na Aloni yaile yanena Falao amazwi yano Yeova wayanenyile aakuti: ‘Ndi cakuti utalesile antu yane yaapita, ndaleta ivizembele umu mpanga yako.’ Mu mang’anda yonsi aa Ina Ijipti, apiina na akankala, mwali vizembele. Nupya umu mpanga yonsi sile mwali ivizembele. Lelo umu mpanga iya Gosyeni, umwikalanga Aina Izlaeli, mwene mutaali ivizembele. Icinkunka cii icalenga 4, ni vyalondeliilepo, vyacitikiile sile Aina Ijipti. Falao watile: ‘Tupaapatileko kuli Yeova ukuti afumyepo ivizembele vii. Nimaleka antu yako yaapita.’ Lelo lino Yeova wafumizyepo ivizembele, Falao atalesile ukuti Aina Izlaeli yaapita. Uzye Falao watazile asambililako kuli vino vyamucitikiile?

Yeova watiile: ‘Ndi cakuti Falao atalesile kuti antu yane yaapita, Inyama zyonsi zya ina Ijipti zilalwala, nupya zilafwa.’ Uwanda walondeliilepo, inyama zyatandike ukufwa. Lelo inyama zya Ina Izlaeli zitafwile. Nomba Falao watwalilile sile ukuya ni cilumba, nupya ataalesile ukuti Aina Izlaeli yaapita.

Lyene Yeova wanenyile Mose ukuswilila kuli Falao nu kutola itwi alino alisumbila umu muza. Itwi lyasalanganile umu muza nupya lyaali pa Ina Ijipti yonsi. Cii calenzile Aina Ijipti yonsi ni nyama zyao kukwata ivilonda ivyawayanga sana. Nupya kwene Falao wakanyile ukuleka Aina Izlaeli yaapita.

 Yeova watumile Mose kuli Falao nupya, umu kuyamuneena ati: ‘Uzye ucili ukukana ukuleka antu yane yaapita? Mutondo kulaya imvula iipisye.’ Uwanda uwalondeliilepo, Yeova walenzile ukuti kuye imvula iya mawe, kupangalakansya, nu moto. Kutatazile ikuya imvula iipisye wakwe ii mu Ijipti. Miti yonsi ni vilimwa, vyononyilwe, kufumyako sile ivyali mu Gosyeni. Falao watiile: ‘Tupaapatileko kuli Yeova ukuti alesye imvula! Lyene nimamuleka mwapita.’ Lelo lino imvula ya mawe yatiile sile ukutoonya, Falao wakanyile ukuyaleka yaapita.

Lyene Mose walanzile ati: ‘Makanta alalya ivilimwa vyonsi vino imvula ya mawe itoononyile.’ Makanta umwingi sana waliile vyonsi ivyasiile mu vyalo, ni miti kwene. Falao walanzile ati: ‘Tupaapatileko kuli Yeova ukuti afumyepo makanta wii.’ Lelo na lino Yeova walesizye makanta wii, Falao watwalilile ukukana.

Yeova wanenyile Mose ati: ‘Konzolola ikasa lyako umwi iyulu.’ Papo kwene sile kwali imfinzi. Pa manda yatatu, Aina Ijipti yatalolanga nanti acimwi nanti ali wensi. Lelo ukwikalanga Aina Izlaeli kwene kwali uluswepo.

Falao wanenyile Mose ati: ‘Wemo na antu yako mungapita. Lelo inyama zyene musye.’ Mose watiile: ‘Tulinzile ukusenda inyama pakuti tukapeele ilambo kuli Leza witu.’ Falao wasosile sana. Wanenyile Mose ati: ‘Fuma pano! Nga waca wawela kuno nupya, ndakukoma.’