Moses im Aron rar etal ñan ippãn Pero im jiroñe naan kein an Anij: ‘El̦aññe kwõjjab kõtl̦o̦k armej ro aõ, inaaj jilkinwaj l̦oñ ko ñan ãnin ãneemi.’ Innem ear jilkinl̦o̦k bwijjin l̦oñ ñan m̦õko im̦õn RiIjipt ro, m̦õn rũm̦weiie ro im m̦õn rijjeram̦õl ro jim̦or. Aolepen ãneo ear obrak kõn l̦oñ. Ak ilo jikin eo RiIsrael ro rar jokwe ie etan Goshen, ear ejjel̦o̦k l̦oñ ie. Eñin kar menin kaeñtaan eo kein kãmen. Im jino jãn kar menin kaeñtaan in, RiIjipt ro wõt rar jorrããn. Innem Pero ear kajjitõk im ba: ‘Jouj im akwel̦ap ñan Jeova bwe en bõkl̦o̦k l̦oñ kein jãn ippemmim. Armej ro am̦ remaroñ etal.’ Ak ke Jeova ear jol̦o̦k l̦oñ ko, ear oktak l̦õmn̦ak eo an Pero. Ñããt Pero enaaj katak im kajim̦we l̦õmn̦ak eo an?

Jeova ear ba: ‘El̦aññe Pero ejjab kõtl̦o̦k armej ro aõ, innem menninmour ko nejin RiIjipt ro renaaj nañinmej im mej.’ Kõn men in, ilo raan eo tok juon, ear mej menninmour ko nejier. Ak menninmour ko nejin RiIsrael ro wõt rar mour. Jekdo̦o̦n ak Pero ear kwal̦o̦k wõt an utiej bũruon, im ear jab kõn̦aan roñjake.

Innem Jeova ear jiroñ Moses bwe en bar etal ñan ippãn Pero, im en bõk jet melkwaarar in kijeek im julõñl̦o̦k. Melkwaarar kein rar oktak ñan bũñal im koobrak mejatoto, im rar wõtlo̦k im jok ioon ãnbwinnin aolep RiIjipt ro. Innem bũñal kein rar kõm̦m̦an bwe en eddek wõt ilo ãnbwinnin aolep RiIjipt ro ekoba menninmour ko nejier. Meñe men in ear wal̦o̦k, ak Pero ear m̦akoko wõt in kõtl̦o̦k an RiIsrael ro etal.

Jeova ear bar jilkinl̦o̦k Moses ñan ippãn Pero bwe en ba ñane naan kein An: ‘Ta, kwõj m̦akoko wõt in kõtl̦o̦k  armej ro aõ ke? Ilju inaaj kõm̦m̦an bwe en wõtlo̦k dekã ioon ãnin ãneemi.’ Innem ilo raan eo tok juon, Jeova ear ko̦wõtlo̦k dekã, im ear kõm̦m̦an bwe en bar wal̦o̦k jourur im kijeek jãn lañ. RiIjipt ro rej kab iioon juon l̦añ me ej make wõt nana jãn aolep l̦añ ko jet. Aolep wõjke im menin eddek ko ijoko jikier rar jorrããn, ak ear jab ãindein ilo Goshen. Innem Pero ear ba: ‘Kom̦win akwel̦ap ñan Jeova bwe en kõm̦m̦an bwe jorrããn kein ren bõjrak! Ãlikin, kom̦ maroñ ilo̦k.’ Ak ke ej bõjrak jorrããn kein, ear bar oktak l̦õmn̦ak eo an Pero.

Innem Moses ear ba: ‘Kiiõ enaaj lõñ lokõs im renaaj kañi menin eddek ko otemjej me rar jab jorrããn ilo l̦añ eo.’ Kõn men in, elõñ bwijin bwijin lokõs rar kañ bõlõk in aolep menin eddek ko ilo jikin kallib ko im wõjke ko. Pero ear bar kajjitõk im ba: ‘Jouj im akwel̦ap ñan Jeova bwe en jol̦o̦k lokõs kein jãn ippemmim.’ Ak ke Jeova ear jol̦o̦k lokõs ko ilo ãneo, Pero ear kwal̦o̦k wõt an pen bũruon.

Jeova ear ba ñan Moses: ‘Kwõn kotak peim̦ ñan lañ.’ Innem ke Moses ear kõm̦m̦ane men in, ear m̦õkaj an lukkuun marok. Ium̦win jilu raan, RiIjipt ro rar jab maroñ loe jabdewõt men im jabdewõt armej. Ak ear wõr wõt meram ilo ijoko jikin RiIsrael ro.

Innem Pero ear ba ñan Moses: ‘Kom̦win etal, ak menninmour ko nejimi ren pãdwõt.’ Ak Moses ear ba ñane: ‘Kõmij aikuj bũki menninmour ko nejũmmim bwe kõmin katok kaki ñan Anij eo ammim.’ Ke ear ba men in, Pero ear lukkuun illu. Ear bũroñe Moses im ba: ‘Kwõn etal jãn im̦aan meja! Ñe inaaj bar lo eok, kwõnaaj mej.’