Mosesa na Alone va ile kuli Falao mu ku mu leka via handekele Njambi, ngueni: ‘Nga u viana ku patula vantu vange, nji ka tuma vandzindzi mu cifuti cose.’ Ngeci vindzema via vandzindzi via sulile mu vindzivo via vakua Ingito vose, cipue vampite ni vihutu. Cifuti cose ca sulile vandzindzi. Vunoni ku Ngosene ku va kele vaIsaleli, ka kua kele vandzindzi. Tunde ha cipupu eci ca mu ciuana, vipupu via hateleko via kele lika na ku yandesa vakua Ingito. Falao ua lambelele Mosesa na Alone, ngueni: ‘Vundilenu Yehova a tundise ava vandzindzi. Vantu veni vaye ngano.’ Vunoni omo Yehova ua tundisile vandzindzi mu Ingito, Falao ua vianene ku ecela vaIsaleli. Vuno, tangua lika Falao ua tavele ku likela vimpata?

Yehova ua handekele ngueni: ‘Nga Falao a viana ku ecela vantu vange, vimuna va mu Ingito vose va ka vavala na ku tsa.’ Lia mukuavo, vimuna va putukile ku-tsa. Vunoni vimuna va vaIsaleli ka va tsile. Vutuhu ngoco, Falao kasi ua tualeleleho vimpata.

Kaha Yehova ua lekele Mosesa a hilukile kuli Falao na ku ka mbila muto muilu. Muto uaco ua himpukile mpumputa ya lalumukilile vakua Ingito vose. Mpumputa yaco ya nehele mahote kuli vakua Ingito vose hamo lika na vimuna vavo. Vutuhu ngoco Falao ka tavele ku ecela vaIsaleli.

Yehova ua tumine Mosesa a hilukile kuli Falao ku ka mu leka muzimbu ueni ngueni: ‘Kasi u na viana ku  patula vantu vange vaye ni? Mene nji ka nokesa niondzi ya civue.’ Lia mukuavo, Yehova ua nokesele niondzi ya civue na mihiato na tuhia. Vakua Ingito kanda va ci mone niondzi ya cifua cize. Ya uisile miti na ku pihisa vimbuto viose, vunoni via ku Ngosene ka via pihile. Falao ua handekele ngueni: ‘Vundilenu Yehova emike eyi niondzi! Kaha mu vose citava muye.’ Vunoni omo niondzi ya likelele, Falao ua vianene naua.

Kaha Mosesa ua handekele ngueni: ‘Vambimba va ka lia viose vi na lisupile ku niondzi ya civue.’ Ngeci vambimba va vengi va lile viose via lisupile mu mehia na ku miti. Falao ua lambelele naua ngueni: ‘Vundilenu Yehova a tundise ava vambimba.’ Vunoni cipue mu nima ya ku va tundisa, Falao kasi ua vianene ku ecela vaIsaleli.

Yehova ua lekele Mosesa ngueni: ‘Olola livoko liove muilu.’ Haze vene, lilu lia himpukile milima. Vakua Ingito ka va hasele ku mona viuma ni ku limona umo na mukuavo mu matangua atatu. VaIsaleli lika va kele mu ceke kuimbo liavo.

Falao ua lekele Mosesa ngueni: ‘Nove na vantu vove citava muye. Vunoni sezenu vimuna venu.’ Mosesa ua kumbuluile ngueni: ‘Tua pande ku ambata vimuna vetu, linga tu ka va kombeleye kuli Njambi yetu.’ Ngeci Falao ua nienguele cikuma. Ua tambakanene ngueni: ‘Tundenu ku meso ange! Nga nja ku mi mona naua, nja ku mi tsiha.’