Moisés uan Aarón kiitatoj faraón uan kiiljuijkej tlen toTeotsij kinnauatik: “Tlaj amo tijkauas ma yakaj notekipanojkauaj, niinmechtitlanilis miakej sayolimej”. Nopa sayolimej tlauel uejueyij eliyayaj uan kintsopiniyayaj o kinkuayayaj maseualmej. Tlauel miakej sayolimej kalajkej ipan ininchaj katli tlatominpixtoyaj uan nojkia ipan ininchaj teikneltsitsij. Ipan nochi Egipto itstoyaj ni sayolimej, uan ipan tlali Gosén, kampa itstoyaj israeleuanij, amo kalajkej. Ni uan nopa sekinok tlamantli tlen ika toTeotsij nojua kintlatsakuiltik egiptoeuanij, ayokmo kinasik israeleuanij. Faraón kiiljuik Moisés: “Xikiljui Jehová ma kinijkuini ni sayolimej, uan teipa uelis inyasej”. Uan kema Jehová kinijkuinik nopa sayolimej, faraón moyolpatlak uan amo kinkajki ma yakaj. ¿Timoiljuia faraón motlalnamiktiskia?

Teipa Jehová kiijtok: “Tlaj faraón amo kinkauas ma kisakaj notekipanojkauaj, inintlapialjuaj egiptoeuanij mokokosej uan mikisej”. Ualmostla, egiptoeuanij inintlapialjuaj mijkej, san israeleuanij inintlapialjuaj amo tleno kinpanok. Maske ya nopa panok, faraón amo kinkajki israeleuanij ma yakaj pampa tlauel tochontik eliyaya.

Teipa, Jehová sampa kiiljuik Moisés ma kiitati faraón, uan ma kimajkaua kuajnextli ajakatipa. Nopa kuajnextli mochijki kej tlaltejpoktli uan kinasik egiptoeuanij. Nopa tlaltejpoktli kichijki egiptoeuanij  uan inintlapialjuaj ma kokotikaj. Maske panok ni, faraón sampa kiniljuik amo kinkauiliskia ma yakaj.

Jehová sampa kiiljuik Moisés ma kiiljuiti faraón: “¿Nojua amo tijneki tikinkauas notekipanojkauaj ma kisakaj? Mostla nijchiuas ma uetsi tesiuitl”. Ualmostla, Jehová kichijki ma uetsi tesiuitl, ma tlatomoni uan ma tlapetlani. Amo kema kiampa panotoya ipan Egipto. Nopa tesiuitl kinempolok mili uan nochi kuatinij ipan Egipto, san ipan tlali Gosén amo tlanempolok. Uajka faraón kiiljuik Moisés: “Xikiljui Jehová ayokmo ma uetsi tesiuitl, uan na niinmechkauas xiakaj”. Uan kema faraón kiitak ayokmo uetsiyaya atl yon tesiuitl, amo kinkajki ma yakaj.

Uajka Moisés kiijtok: “Nama chapolimej kikuasej nochi tlen nopa tesiuitl amo kinempolok”. Tlauel miakej chapolimej asitoj ipan Egipto uan kikuajkej nochi tlen mokajtoya ipan kuatinij uan milaj. Uajka faraón kiiljuik Moisés: “Xikiljui Jehová ma kinijkuini ni chapolimej”. Uan maske Jehová kinijkuinik nopa chapolimej, faraón nojua moyoltetilik.

Teipa, Jehová kiiljuik Moisés: “Xijtlalana moma”. Kema Moisés kitlalanki ima, nima tlatlayouixki, tlauel tsintlayoua mokajki. Egiptoeuanij eyi tonali amo tleno kiitakej. San kampa itstoyaj israeleuanij kena tlatlanestoya.

Faraón kiiljuik Moisés: “Inmojuantij uelis inyasej. San xikinkajteuakaj nochi inmotlapialjuaj”. Uan Moisés kinankilik: “Moneki tikinuikasej totlapialjuaj, kiampa uelis tijmakasej tlakajkaualistli toTeotsij”. Faraón tlauel kualanki uan chikauak kiiljuik: “¡Xinechtlalkaui, uan xia! Tlaj sampa nimitsitas, nimitsmiktis”.