Moses naAaron oya yi kuFarao ye ke mu lombwele etumwalaka lyaKalunga tali ti: ‘Ngele oto tindi okweetha aantu yandje ya ye, otii ka tuma omatopola moshilongo shoye.’ Omatopola ogu udha momagumbo gAaegipiti, gaayamba nogoohepele. Oshilongo ashihe osha li shu udha omatopola. Ihe oshilando shaGoshen moka mwa li Aaisraeli, kamwa li omatopola. Okuza ngaa kegeelo etine, Aaegipiti oyo owala ya li ya hepekwa komageelo ngoka. Farao okwi indile Moses a ti: ‘Indila Jehova a kuthe po omatopola ngaka. Aantu yoye otaya vulu okuya.’ Ihe sho Jehova a kutha po omatopola, Farao okwa lundulula omadhiladhilo ge. Mbela okwa li ngaa i ilonga mo sha megeelo ndyoka?

Jehova okwa ti: ‘Ngele Farao ine etha aantu yandje ya ye, iinamwenyo yomuEgipiti otayi ka kwatwa kuuvu notayi ka sa.’ Esiku lya landula ko, iinamwenyo oya tameke okusa, ihe yAaisraeli inayi sa. Natango Farao okwa li owala a kukutika omutse, noina pupa ko.

Nena Jehova okwa li a lombwele Moses a shune kuFarao, e ta gundu omutoko mombepo. Omutoko otagu ka gundumuka gwa fa ontsi mombepo e tagu nambele kAaegipiti ayehe. Ontsi ndjoka oye etele Aaegipiti ayehe nosho wo iinamwenyo yawo iilalo tayi ehama. Nonando ongawo, Farao okwa tindi okweetha Aaisraeli ya ye.

Jehova okwa tumu Moses a shune ko kuFarao,  netumwalaka tali ti: ‘Natango oto tindi okulaleka aantu yandje ya ye? Ongula, omvula yoompawe otayi ka loka moshilongo.’ Esiku lya landula ko, Jehova okwa tumu oompawe, omindundumo nomulilo. Osha li oshikungulu oshidhigu inaashi monika mo nando onale muEgipiti. Oshikungulu osha yonagula po omiti niimeno ayihe, ihe mbyoka yomuGoshen inayi ningwa sha. Farao okwa ti: ‘Galikaneni Jehova a hulithe po oshikungulu shika, opo nduno otamu vulu okuya.’ Ihe sho ngaa omvula yoompawe ya sheka, Farao okwa lundulula omadhiladhilo ge.

Moses okwa ti: ‘Oombahu otadhi ka lya po ashihe shoka sha thigwa po koompawe.’ Oombahu omamiliyona odha li po ashihe shoka sha li sha thigala momapya nokomiti. Farao okwi indile Moses a ti: ‘Galikana kuJehova a kuthe po oombahu ndhika.’ Nonando Jehova a hulitha po oombahu, Farao okwa li natango a kukutika omutse.

Jehova okwa lombwele Moses a ti: ‘Yelutha okwooko kwoye kegulu.’ Mbalambala egulu olya luudha thokothoko. Muule womasiku gatatu, Aaegipiti kaya li we taya vulu okumonathana nenge okumona sha. Aaisraeli oyo ayeke ya li ye na uuyelele momagumbo gawo.

Farao okwa lombwele Moses a ti: ‘Ngoye naantu yoye otamu vulu okuya, ihe iimuna yeni nayi kale po.’ Moses okwa yamukula a ti: ‘Otu na okuya niimuna yetu, opo tu ke yi yambele Kalunga ketu.’ Farao okwa li a geya noonkondo. Okwi igidha a ti: ‘Za po pungame! Ngele onde ku mono po ishewe mpano, otandi ku dhipaga.’