Musa na Arooni bakaza owa Faraho kumugambira obutumwa bwa Ruhanga: ‘Ku oraabe otarekire abantu bangye bakagyenda, niinyija kureetaho enshohera omu mwanya ogu.’ Emizinga y’enshohera ekataaha omu maju g’Abanyamisri, ag’abagaiga na booro. Omwanya gwabo gwona gukaba gwijwire enshohera. Kwonka omuri Gosheni, ahu Abaisraeli baabaire nibatuura, hakaba hatariyo enshohera. Kutandikira aha kibonaboneso kya kaana, ebibonaboneso bikaba biba aha Banyamisri bonka. Faraho akeeshengyereza ati: ‘Munyeshengyerereze Yehova ayaiheho enshohera ezi. Abantu baanyu nibabaasa kugyenda.’ Kwonka Yehova ku yaihireho enshohera, Faraho yaahindura ekiteekateeko kye. Mbwenu Faraho akaba naija kwega ishomo?

Yehova akagira ati: ‘Faraho ku araayangye kurekura abantu bangye kugyenda, amatungo g’Abanyamisri nigaija kurwara kandi gafe.’ Eizooba eryakuratsireho, amatungo gakatandika kufa. Kwonka amatungo g’Abaisraeli tigarafiire. Kwonka nabwo Faraho akaguma aine amaryo, akanga kubaikiriza kugyenda.

Bwanyima Yehova akagambira Musa kugaruka owa Faraho kandi akatambika eiju ryakashenda ahaiguru. Eiju ryakashenda rikahinduka omucuucu gwijura omu mwanya n’aha Banyamisri boona. Omucuucu ogwo gukareetera Abanyamisri boona n’enyamaishwa zaabo zoona kurwara ebironda. Kwonka nabwo, Faraho akanga kwikiriza Abaisraeli kugyenda.

 Yehova akagaruka yaatuma Musa owa Faraho naagira ati: ‘Na hati okyangire kurekura abantu bangye? Nyencakare niinyija kugwisa orubaare omuri Misri.’ Ekiro ekyakuratsireho, Yehova akagwisa orubaare, emirabyo n’omuriro. Rukaba ruri orubaare rubi munonga orutakabahoga omu nsi ya Misri. Emiti yoona n’ebimera byona bikacwekyerezibwa, kwonka eby’omuri Gosheni bikagumaho. Faraho akagira ati: ‘Mweshengyereze Yehova aiheho orubaare. Obwo nimwija kugyenda.’ Kwonka Faraho ku yaareebire orubaare rwahwaho, yaahindura ekiteekateeko kye.

Musa akagira ati: ‘Hati enzigye niziija kurya buri kimera ekyatsigirweho orubaare.’ Enzigye nyingi zikarya buri kimwe ekyabaire kitsigaire omu misiri n’aha miti. Faraho akeeshengyereza ati: ‘Mweshengyereze Yehova aiheho enzigye.’ Kwonka nabwo, Yehova ku yaihireho enzigye Faraho akaguma aine amaryo.

Yehova akagambira Musa ati: ‘Imutsya omukono gwawe, ogworekye ahaiguru.’ Ahonaaho, hakabaho omwirima mwingi. Okumara ebiro bishatu, Abanyamisri bakaba batarikubaasa kureeba omuntu nari ekintu. Abaisraeli bonka bakaba baine ekyererezi omu maju gaabo.

Faraho akagira Musa ati: ‘Iwe n’abantu baawe nimubaasa kugyenda. Kwonka mutsigyeho amatungo gaanyu.’ Musa akagira ati: ‘Twine kutwara amatungo gaitu kugira ngu tutungye eby’okutambira Ruhanga waitu.’ Faraho akagira ekiniga kingi. Yaagamba munonga ati: ‘Ruga aha. Otarigaruka omu maisho gangye, ku origaruka oryafa.’