Moiseswan Aaronqa Dios kënö ninqanta willaqmi faraonman ëwayarqan: “Markä ëwakunanta mana jaqiptikiqa, kanikoq tumpushkunatam yuritsimushaq”. Tsë kurukunaqa kanikoq jatun chuspikunam kayarqan. Tsënö waranqëpayan chuspikunam Egiptuchö waktsa nunakunapa y kapoqyoq nunakunapa wayinkunaman juntariyarqan. Entëru nacionchömi karqan. Peru israelïtakuna täräyanqan Gosen markachöqa manam ni jukpis karqantsu. Tsë chusku kaq castïgupita patsëqa Egiptu nunakunallanam castïgukunata chaskiyarqan. Tsëmi faraonqa Moisesta kënö rogarqan: “Kë chuspikuna ushakänampaq Diosnikiman mañakï. Tsëqa jaqishaqmi markëki ëwakunanta”. Peru ushakäratsiptinqa yapëmi ëwakuyänanta munarqantsu. Pensari, ¿faraonqa imëllapis yachakunmantsuraq karqan?

Jehoväqa kënömi nirqan: “Markä ëwakunanta faraon mana jaqiptinqa, Egiptu nunakunapa animalninkunam qeshyar wanuyanqa”. Y ninqannöllam waränin junaqqa pasakurqan, peru israelïtakunapa animalninkunaqa manam wanuyarqantsu. Y tsënö pasëkaptimpis chukru shonqu karmi faraonqa mana yachakurqantsu.

Tsëmi Jehoväqa Moisesta mandarqan faraonman yapë ëwëkur uchpata vientuman jitanampaq. Y tsë uchpaqa polvunö tikrëkurmi llapan Egiptu nunakunapa janankunaman ishkirqan. Y nunakunapa y animalkunapa qarankunatam qeri usharirqan. Peru faraonqa yapëmi israelïtakuna ëwakuyänanta jaqirqantsu.

 Jehoväqa yapëmi Moisesta kacharqan faraonta kënö ninampaq: “¿Jawkallaraqku markä ëwakunanta munankitsu? Tsëqa warëmi runtu tamyata tamyatsimushaq”. Y waränin junaqqa, runtu tamya, räyukuna y nina tamyam karqan. Tsënöqa manam ni imëpis Egiptuchö pasakurqantsu. Llapan montikunata y chakrakunatam ushakätsirqan, peru Gosenchö kaqtaqa manam. Tsënam faraonqa kënö nirqan: “Këkuna päranampaq Jehoväman mañakï, tsëqa ëwakuyankim”. Peru pärariptinqa, yapëmi faraonqa munarqantsu.

Tsënam Moisesqa kënö nirqan: “Kananqa, tamya mana ushakätsinqan plantakunatam pinteq kurukuna chipyëpa ushanqa”. Tsënam millonyëpayan pinteq kurukuna montikunata y murukïkunata usharirqan. Faraonqa yapëmi Moisesta kënö rogarqan: “Jehoväman mañakï kë pinteq kurukunata ushakätsinampaq”. Peru tsë kurukunata Jehovä ushakäratsiptimpis faraonqa manam wiyakurqantsu.

Jehoväqa kënömi Moisesta nirqan: “Makikita ciëluman pallari”. Y pallarkuptinqa jinan höram ampïrirqan. Egiptu nunakunaqa kima (kimsa) junaqmi ni imatapis rikäyarqantsu. Peru israelïtakuna täräyanqanchöqa inti atsikyarqanmi.

Faraonqa kënömi Moisesta nirqan: “Qamwan markëkiqa ëwakuyë, peru animalnikikunataqa manam apayankitsu”. Moisesnam kënö nirqan: “Diosnïkunapaq ofrendayänäpaqmi animalnïkunataqa apakuyänä”. Tsënam faraonqa alläpa piñakur kënö nirqan: “¡Këpita ras ëwakï! Yapë rikarnikiqa wanuratsishqëkim”.