Moisespish Aaronpish faraonpajman rishpaca Diosca, ‘ñuca agllashcacuna richun mana saquijpica tucui laya chuspicunatami cachasha ninmi’ nircacunami. Chai chuspicunaca jatuncuna, canijcunami carca. Egipto llajtapi charij, huajcha gentecunapaj huasicunapimi achca chuspicuna yaicurcacuna. Egiptopi chuspicunaca jundami carca. Pero israelitacuna causacuj Gosén llajtapica shujllapish mana yaicurcachu. Cai chuscu llaquicunamanta callarishpaca egipciocunallatami llaquichirca. Chaimi faraonca Moisesta rogarca, ‘chuspicunata anchuchichun Jehovata mañai. Qꞌuipaca cancunaca ringuichijllami’ nishpa. Jehová chuspicunata anchuchijpica faraonca cutinmi yuyaita cambiarca. ¿Faraonca Jehová paipaj poderta ricuchicushcataca ima hora intindingachu?

Qꞌuipaca Diosca, ‘faraón ñuca llajta llujshichun mana saquijpica Egiptopi tiyaj tucui laya animalcunami yallitaj jatun ungüihuan huañunga’ nircami. Cayandij punllaca Jehová Dios nishca shinami tucurca. Pero israelitacunapaj animalcunaca ima mana tucurcacunachu. Chashna cajpipish faraonca rumi shungu tucushpami mana cazusha nirca.

Chaimi Diosca Moisestaca cutin faraonpajman rishpa ushpata huairaman shitachun mandarca. Jahuata shitajpica ñutu allpa shina tucushpami tucui Egiptopi urmarca. Chai ñutu allpaca gentecunatapish animalcunatapish achcatami chugrichirca. Chashna jahuapish faraonca israelitacunataca mana cachasha nircachu.

 Diosca cutinmi Moisestaca faraonman cashna nichun cacharca, ‘ñuca agllashcacuna richun manaraj saquishcanguichu. Jatun rundutami cayaca tamyachisha’ nishpa. Cayandij punllaca Dios nishca shinami cꞌulun nishpa, nina achij nishpa rundurca. Egiptopica nunca mana chashna rundushcachu carca. Tucui granocunata, yuracunatami tucuchirca. Pero, Gosenpica mana ima tucurcachu. Chaimi faraonca Moisestaca, ‘Mandaj Diosta mañai. Cancuna richun saquishallami’ nirca. Pero ña usiyarijpica faraonca cutinmi yuyaita cambiarca.

Chaimantami Moisesca, ‘cayatajmi langostacunaca rundumanta saquirishca granocunatapish tucuita micunga’ nirca. Langostacunaca jatun saltamonte shinami can. Achca millón langostacunami rundumanta saquirishca yuracunata, granocunata tucuita micurca. Chaipimi faraonca Moisestaca, ‘langostacunata anchuchichun Diosta mañai’ nishpa rogarca. Pero, Dios langostacunata anchuchijpica faraonca cutinmi rumi shungu tucurca.

Qꞌuipaca Diosca Moisestaca, ‘cambaj maquita jahuaman alzai’ nircami. Chai ratomi Egiptopica yallitaj amsa tucurca. Quimsa punllacunatami imata mana ricurcacuna. Israelitacunapaj huasicunallapimi achijlla carca.

Faraonca Moisestaca, ‘canpish cambaj llajtapish richijlla. Pero, cancunapaj animalcunataca saquichij’ nircami. Moisesca, ‘Diosman ofrendata cungapajmi animalcunataca apashpa rina canchij’ nirca. Chaipica faraonca yallitaj pꞌiñarishpami, ‘ñuca ñaupajmanta anchui. Ñuca ñahuita ricunaman shamujpica huañuchishami’ nirca.