Kaqmantam Moiseswan Aaronqa faraonman rirqaku Jehova Diosmanta kaynata willanankupaq: “Runaykunata mana kachariptikiqa ñuqam kachamusaq achka-achka tankayllukunata”, nispa. Chaymi kachukuq tankayllukuna Egipto runakunapa wasinman lliw huntarurqa. Israel runakunapa yachasqanku Gosen llaqtapim ichaqa mana karqachu. Tawa castigomanta qatiqnin castigokunaqa manañam Israel runakunataqa sasacharqañachu. Faraonmi Moisesta ruegakuspan nirqa: “Ñuqam kacharisqaykichik, ichaqa Diostayá mañakuychik tankayllukunata chinkachinanpaq”, nispa. Jehova Dios chinkarachiptinñataqmi faraonpa sunqun kaqlla rumiyarurqa.

Hinaptinmi Diosqa nirqa: “Runaykunata mana kachariptinqa Egipto runakunapa animalninkum peste unquywan wañurunqa”, nispa. Jehova Diospa nisqanman hinam paqarinnintin lliw animalninku wañururqa, Israel runakunapam ichaqa mana. Chaywanpas faraonqa hinallam rumi sunqu karqa.

Chaymi Diosqa Moisesta kamachirqa faraonman kutispa uchpata altoman maqchinanpaq. Chay maqchisqan uchpawanmi runakunapi hinaspa animalkunapi chupu unquy rikurirurqa. Chaywanpas faraonqa manam kacharirqachu.

Diosqa kaqmantam faraonman nichirqa: “Runaykunata mana kachariptikiqa paqarinmi nisyu  runtu parata chayachimusaq”, nispa. Chaymi Jehova Diosqa llipyachispan, tunrururuchispan runtu parata chayachimurqa. Chayna paraqa manam haykapipas Egiptopiqa karqachu. Lliw sachakunatawan tarpusqakunatam tukururqa, Gosen llaqtamanmi ichaqa mana chayarqachu. Chaymi faraon nirqa: “Usyachinanpaqyá Diosta mañakuychik, kachaykusqaykichikñam”, nispa. Usyaramuptinpas faraonqa rumi sunqullam karqa.

Chaymi Diosqa faraonman nichirqa: “Kachamusaqmi aqarway urukunata runtu paramanta puchuqkunata tukunanpaq”, nispa. Chaynamá karqa, chaymi faraonqa Moisesta nirqa: “Diostayá mañakuy kay aqarway urukunata chinkachinanpaq”, nispa. Chaywanpas faraonqa manam kasukurqachu.

Jehova Diosñataqmi Moisesta nirqa: “Makikita altoman huqariy”, nispa. Hinaptinmi kimsa punchaw qalaypaq tutayarurqa. Israelpa lliw mirayninkunapa yachasqanpim ichaqa achkiy karqa.

Faraonñataqmi Moisesta nirqa: “Rispayá Diosnikichikta yupaychamuychik, animalnikichiktam ichaqa saqinaykichik”, nispa. Hinaptinmi Moises nirqa: “Animalniykutapas apasaqkum Jehova Diospaq kañapunaykupaq”, nispa. Faraonñataqmi piñasqallaña nirqa: “¡Pasaway qayllaymanta! Yapatawan hamuwaptikiqa wañurachisqaykim”, nispa.