Moiseswan Aaronwanmi faraonman willaranku Diospa nisqanta, nirankun: “Manachus llaqtayta kacharinki chayqa, llaqtaykimanmi jatuchachaq ch’uspikunata kachaykamusaq”, nispa. Chay ch’uspikunaqa kanikuqmi kanku. Aqo jinaraqmi ch’uspikunaqa llaqtantinman junt’aykuran. Israel runakunaq tiyasqanku Gosén llaqtapin ichaqa mana jujllapas karanchu. Kay tawa kaq plagamanta wichaymanqa Egipto runakunallatan castigaran. Faraonmi Moisesta valekuran: “Diosmanta mañakuy ch’uspikunata chinkachinanpaq, jinan llaqtanta kacharisaq”, nispa. Dios chinkachiqtintaq faraonqa mana junt’aranchu rimasqanwan. ¿Jayk’aqllapas kasukunmanchu?

Chay qhepamanmi Diosqa niran: “Sichus faraón llaqtayta mana kacharinqachu chayqa, llaqtanpi kaq animalkunan onqospa wañupunqaku”, nispa. Paqaristinmi Diospa nisqanman jina pasaran, Israel runakunaq animalninmi ichaqa mana wañuranchu. Chaywanpas faraonqa manan kasukuranchu.

Jinan Diosqa Moisesta niran: “Faraonpa ñaupaqenpin usphata wayraman jach’inki”, nispa. Chay usphan cielopi ch’eqerispa Egipto runakunaq patanman urmaykuran. Jinan runakunaq animalkunaq cuerponpi “lleq” nishaq heridakuna rijuriran. Chaywanpas faraonqa manan kachariranchu Israel runakunata.

Jujmantan Diosqa Moisesta kacharan faraonta nimunanpaq: “Llaqtayta mana  kacharisqaykiraykun paqarin chijchichimusaq”, nispa. Jinan Diosqa chijchichimuran, rayota ninatawan chayachimuran. Chayqa manan jayk’aqpas Egipto llaqtapiqa karanchu. Llapa campokunatan q’ara pampaman tukuchiran, Gosén llaqtatan ichaqa mana. Chaymi faraonqa niran: “Diosmanta mañakuy amaña chijchichimunanpaq, jinan ripunkichis”, nispa. Manaña chijchimuqtintaq faraonqa rimasqanwan mana junt’aranchu.

Chaymi Moisesqa niran: “Kunanqa langostakunan llapa puchuq plantakunata mijupunqa”, nispa. Millonninpi langostakunan puchuq sach’akunata plantakunatapas mijupuranku. Jinan faraonqa Moisesta valekuran: “Jehová Diosmanta mañakuy langostakunata chinkachipunanpaq”, nispa. Jehová Diosqa chinkachiranmi, faraonmi ichaqa mana kasukuqlla kasharan.

Chaymantan Diosqa Moisesta niran: “Cieloman makiykita oqariy”, nispa. Jinan tutayapuran, kinsa p’unchaymi Egipto llaqtapi nishu tutayaq kasqanrayku mana imatapas rikurankuchu. Israel runakunapaqmi ichaqa wasinkupi k’anchay karan.

Faraonmi Moisesta niran: “Ripuwaqchismi, ichaqa animalniykichista saqeychis”, nispa. Moisestaq niran: “Jehová Diosman ofrendata jaywanaykupaqmi animalniykutaqa apanaykupuni”, nispa. Jinan faraonqa sinchita phiñakuspa niran: “¡Ripuy ladoymanta! ¡Jujmanta rikuspayqa wañuchisaykin!”, nispa.