Moisespash Aaronbash Taita Dios nishcata villangapaj rishpami faraondaca cashna nirca: “Ñuca agllashcacunata richun na saquijpica” Egipto llactaman tábano nishcatami cachamusha nishpa. Tábano nishcacunaca jatun chuspicunami carca. Chai chuspicunaca ninandami pican carca. Chai ashtaca ashtaca chuspicunami, ‘faraonba huasipi, paita sirvijcunapa huasicunapipash, tucuilla Egipto llactapimi ninanda jundanajurca’. Shinapash israelitacuna causanajuj Gosén llactapica ni shuj chuspillapash na tiarcachu. Cai plagapash, cati plagacunapash Egiptopi causajcunatallami llaquichirca. Israelitacunataca na llaquichircachu. Chaimi faraonga Moisestaca cashna rogarca: Cai chuspicunata anchuchichun Jehovata mañapai. Chaica israelitacunataca richun saquishallami nishpa. Jehová Dios tucuilla chuspicunata anchuchijpipash, faraonga israelitacuna richunga na saquircachu. Imatata yuyangui, ¿faraón chaita ricushpaca cambiarcacha?

Chai jipaca Jehová Diosca Moisesman cashnami nirca: ‘Richun saquingapaj na munashpa can jarcajujpica, canba animalcunataca llaquichingami’ nishpa. Cayandi punllaca Jehová nishcashnami egipciocunapa tucuilla animalcuna huañurca. Ashtahuangarin israelitacunapa animalcunaca ni shuj na huañurcachu. Shinapash faraonga shinlli shungu caimandami nimamanda na cazungapaj munarca.

Chaimi Jehová Diosca Moisestaca cashna mandarca: ‘Maqui junda uchufata japishpa faraonba ñaupajpi jahuaman tsirapachigri’ nishpa. ‘Chai uchufami, ñutu alpa tucushpa tucuilla Egipto llactapi jicharirca. Shina rurajpimi, chupu tugyanalla caracha ungüica gentecunata, animalcunatapash japirca’. Shinapash, cutinmi faraonga israelitacunataca na cachashachu nirca.

Jehová Diosca cutinmi Moisestaca faraonbaman cashna nichun cacharca: “¿Cunangamanllu ñuca agllashcacuna richun saquingapaj na munashpa fiñanguira?” “Ricui, caya cai horasllatami, Egipto llactapica  runduta tamiachimusha” nishpa. Shinami cayandi punllaca Jehová Diosca “culun nichishpa, runduchishpami, ninatapash cai pachaman cachamurca”. Egipto llactapica, ima horapash na chashna tiashcachu carca. ‘Chai rundumi Egipto llactapica, pambapi tucui ima tiashcatapash, quiru malquicunatapash’ tucuchijurca. “Israelcuna causanajuj Gosén shuti llactapillami, runduca na urmarca”. Chaimandami faraonga nirca: Caita tucuchichun Jehovata mañapai. Shina mañajpica israelitacunaca ringallami nishpa. Shinapash ña chaicuna tucurijpica faraonga israelitacunataca na cacharcachu.

Chaimi Moisesca nirca: ‘Chai langosta jurucunami, rundu na tucuchishca puchushcatapash micunga’ nishpa. Ashtaca ashtaca langosta jurucunami Egipto llactapi quirucunapi ima verdellacunatapash, pamba jihuacunatapash tucuillata micushpa tucuchirca. Chaimandami faraonga Moisestaca cutin cashna nirca: Chai langostacunata anchuchichun Jehovata mañapai nishpa. Shina mañajpimi Jehová Diosca chai langostacunataca anchuchirca. Shinapash faraonba shunguca ashtahuanmi shinlliyarca.

Chai jipaca Jehová Diosca Moisestaca nircami: “Cambaj maquita jahua pachaman chutai” nishpa. “Shina rurajpimi, tucuilla Egipto llactapica, quimsa punllacaman yana yana tuta tucurca”. Chaimi ni pipash na ricuita usharca. “Ashtahuangarin tucuilla israelcunapaj huasicunapica, punchallami carca”.

Chaimandami Faraonga, Moisesta cashna nirca: ‘Rishpa Mandaj Diosta sirvigrichilla’. Cangunapa animalcunata saquishpa richi nishpa. Moisesca cashnami tigrachirca: ‘Ñucanchi animalcunamandaca, shujllapash na quedangachu. Chai animalcunamandami, ñucanchi Taita Diosta sirvingapaca japina canchi’. Chaita uyashpami faraonga ninanda culirashpa cashna caparirca: Caimanda llujshishpa ri. Cutin canda ricushpaca huañuchishami nishpa.