O Mojsije hem o Aron dželje te vačeren e faraonese odova so vačerdža ljendže o Devel: „Ako na mukheja me narodo te džal, ka mukhav o obadija te oven ki celo phuv.“ O obadija tane bare mačha kola hana e manušen hem e životinjen. Tegani, o obadija napadindže e Egipćanen, hem e čororen hem e barvaljen. On pherdže celo egipatsko phuv. Ama, ki phuv Gesem, kuri živindže o Izraelcija, na hine obadija. O prva trin nevolje hine hem aso Egipćanja hem aso Izraelcija, a avera nevolje hine samo aso Egipćanja. O faraon phendža: „Molinen e Jehova te cidel akala obadija. Tegani ka mukhav tumare narodo te džal.“ Ama, ked o Jehova cidindža o obadija, o faraon paljem na manglja te mukhel e narodo te džal. Palo sa odova so ulo, o faraon hem ponodri ačhilo tvrdoglavo.

O Jehova phendža: „Ako o faraon na mukhela me narodo, tegani e Egipćanenge životinje ka naborsaljon hem ka meren.“ Tajsato dive, o životinje počmindže te meren. Ama, e Izraelcenge životinje na mulje. Hem akava puti o faraon na mukhlja e narodo te džal.

O Jehova phendža e Mojsijese te džal ko faraon, te ljel prao hem te fordel lje ko vazduh. O prao širindža pe hem učhardža celo egipatsko phuv. Tegani e Egipćanendže hem oljenge životinjendže ikljilje rane kola but dukhavdže ljen. Ama, o faraon ni palji akija nevolja na manglja te mukhel ljen.

Odoljese, o Jehova paljem bičhaldža e Mojsije ko faraon te phenel ljese: „Pana na mangeja te mukhe  me narodo? Tajsa ka džal bari kukudi ki akija phuv.“ Tajsato dive, o Jehova mukhlja kukudi, gromija hem jag. Odija hine najbari oluja koja hine ko Egipat. Sa o kašta hem o biljke hine uništime, a ko Gesem na hine ništa. O faraon phendža: „Molinen e Jehova te čhinavi akava! Palo odova ka mukhav tumen te džan.“ Ama, ked čhinavdža te džal i kukudi hem o boršim, o faraon paljem na mukhlja e narodo te ikljol ando Egipat.

Tegani, o Mojsije phendža: „A akana, o skakavcija ka han sa so ačhilo ando odova so uništindža i kukudi.“ Palo odova, pojavindže pe but skakavcija hem halje sa so ačhilo ko njive hem ko kašta. O faraon paljem phendža: „Molinen e Jehova te spasini amen ando skakavcija.“ Ama, iako o Jehova cidindža ljen, o faraon paljem na manglja te mukhel e narodo.

O Jehova phendža e Mojsijese: „Vazde to vas upre ko nebo.“ Ko odova trenutko, o nebo kaljilo. Trin dive o Egipćanja hine ki tomnina, naštine ništa te dikhen. Ama, odothe kuri živindže o Izraelcija hine svetlo.

O faraon phendža e Mojsijese: „Tu hem to narodo šaj te džan. Mukhen samo tumare životinjen akate.“ O Mojsije phendža ljese: „Mora te la amare životinjen te šaj te da ljen sar žrtva amare Devljese.“ O faraon hine but holjamo. Počmindža te vičini: „Cide tut mandar! Ako pana jekh puti ikljiljan anglo me jačha, ka mudarav tut!“