О Моисеё и Аароно авелэ каринг о фараоно, кай тэ пэрэдэн лэсти лэ Дэвлэстирэ алава: «Сар ту на одмэкэса мэрно народо, мэ бишалава пэ тири ԥув лэ барэ мақэн, савэ фартэ ханпэ». Пэр лэндэ ԥэнэн оводоря. Лэн сас фартэ бут. Вонэ слинэ ԥэрдо. Слинэ андэ всаворэ цэра кай и египтяноря, кай барвалэ и кай чорэ. Лэндар никай нащи сас тэ гарадён. Но андэ ԥув Гесемо котэ, кай жувэнас израильтяноря, на слинэ кадэла мақа. Кадэя и авэр биды слинэ кати кай и египтяноря. Тоди о фараоно ля тэ мангэл лэ Моисеёс и лэ Ааронос: «Мангэн лэ Иеговас тэ улэл кадэлэ мақэн, савэндар гряца. Мэ одмэкав тумаро народо». Но кала о Иегова уля лэ мақэн, о фараоно на одмэкля лэ народос. О фараоно со, упалэ нисости на сытеля?

О Иегова ԥэндя: «Сар о фараоно на одмэкэла мэрно народо, тоди о ското кай и египтяноря занасвавэла и пастоя». Уже пэ авэр дес о ското ля тэ пастой. Но кай израильтяноря о ското на пастосайля. Но о фараоно всаек на одмэкля лэ народос.

О Иегова приԥэндя лэ Моисеёсти тэ рисавэл каринг о фараоно и тэ подшол каринг о нэбо о прахо. О прахо вазгляпэ андо воздухо и лэс ашэля фартэ бут. И кадэва прахо бэшля пэ египтяноря. Через лэстэ и тила кай всаворэ египтяноря и кай лэнго ското ля тэ тернёл. Но о фараоно всаек на одмэкля лэ израильтянонэн.

 О Иегова упалэ бишалдя лэ Моисеёс каринг о фараоно тэ ԥэнэн: «Ту и доси отԥэндёспэ тэ одмэкэс мэрно народо? Тэся мэ бишалава баро ӷрадо пэ тири ԥув». Пэ авэр дес о Иегова бишалдя ӷрадо, ӷромо и яг. Кацави балвал андо Египто инке никала на сас! Поԥаделэ всаворэ витки и похынделя вся урожаё. Но котэ, кай жувэнас израильтяноря, сас вся драго. О фараоно ԥэндя лэ Моисеёсти и лэ Аароности: «Мангэн лэ Иеговас, кай во тэ тердярэл када вся! Тоди о народо жалатар». Но, сар кати парашэля о ӷрадо и о брышын, о фараоно на пэрэкамля тэ одмэкэл лэ народос.

Тоди о Моисеё ԥэндя: «Кода, со ашэляпэ после ӷрадо, схана и кузнечикоря, савэ фартэ бут хан». Пэ кадэла кузнечикоря ԥэнэн саранча. Кадэя саранча похаля вся па маля и па витки. О фараоно ля тэ мангэл: «Мангэн лэ Иеговас, кай во тэ улэл кадэя саранча». Но даже тоди, кала о Иегова уля ла, о фараоно на одмэкля лэ народос.

О Иегова ԥэндя лэ Моисеёсти: «Ваздэ о вас каринг о нэбо». О нэбо сразу калеля. Сас кадя тэмно, кай и египтяноря нисо на диқэнас. Кадя сас трин дес. Кати лэ израильтянонэндэ андэ цэра сас свето.

О фараоно ԥэндя лэ Моисеёсти: «Ту и тиро народо жантар. Кати ашавэн пэстирэ скотос». О Моисеё ԥэндя: «Най, амэ лэ скотос заласа, кай тэ анас лэс андэ жертва амарэ Дэвлэсти». О фараоно фартэ холяйля. Во зацыписайля: «Вижа па мэрнэ яқа! Сар мэ тут инке еқвар диқава, мэ тут умарава».